Posibilidade Deklara Kandidatura Iha Dili, Horta Sei Halo Reflexaun Durante Oras 48

Smnewstl.com 15-01-2022 (Dili) — Premiadu Nobel da Páz, José Ramos-Horta deklara, posibilidade sei deklara ninia kandidatura ofisialmente bá Prezidente Repúblika (PR) iha Munisípiu Dili, tanba Dili povu husi husi Munisípiu 12 inklui enklave Oe-cusse.

José Ramos-Horta dehan, sei halo reflexaun durante oras 48 nia laran molok deside ninian kandidatura bá Prezidente Repúblika.

“Primeiru ha’u sei halo reflexaun 48 oras mai oin ne’e, la’e la signfika ida-ne’e, posibilidade sé ha’u kandidatu aan. Komforme sé ha’u kandidatu aan duni, bele iha Dili karik lahatene, tanba Dili ema husi Munisípiu hotu, o bá munisípiu ida ne’e munisípiu ida ne’ebá, mais halo iha Dili ema Ermera mós lubuk ida iha ne’e, Aileu, Baucau lubuk ida, Laga entaun kuaze Laga tomak iha ne’e, Quelecai mós iha ne’e,” dehan Eis PR, Ramos-Horta, iha Dom Bosco Comoro, Dili, sábdu ne’e.

Nia hatutan, Segunda-feira semana oin, sei bá halo diálogu ho estudante no akadémiku sira iha Munisípiu Baucau, no mós sei partisipa iha serimónia ida ne’ebé sei hala’o iha postu administrativu Baguia iha Primeiru-Ministru, Taur Matan Ruak nia rai moris fatin.

Tanba ne’e, la’ós atu bá deklara ofisialmente ninia kandidatura bá Prezidente Repúblika iha Postu Administrativu Bagui Munisípiu Baucau.

“Segunda-feira ha’u atu bá Baucau ko’alia ho estudante akadémiku sira iha ne’ebá, depois bá eventu boot iha Baguia, bá Taur Matan Ruak nia fatin, la’ós tanba Taur Matan Ruak nia fatin, tanba kleur ona ha’u la bá,” dehan Ramos.

Maski nune’e, eis Xefe Diplomata ne’e dehan, uluk nia fó apoiu makas bá programa kuda aí oan iha postu administrativu Baguia, tanba hetan apoiu husi Uniaun Europea.

Entretantu, Ramos-Horta hatutan, atuál Prezidente Repúblika, Francisco Guterres Lú-olo mak sei deklara ninia re-kandidatu bá Prezidente Repúblika iha Munisípiu Ermera iha domingu loron (16/01/22).

Enkuntu Tenente Jenerál Lere Anan Timur promete, sei bá deklara ninia kandidatura iha Munisípiu Ainaro, maibé seidauk iha data ne’ebé fixu bainhira mak atu ofisializa ninia kandidatura.(ant)