Pontu Importante 3 Sai Foku Prinsipál Bá Avaliasaun Jerál Komandu PNTL

Smnewstl.com 16-11-2021 (Dili) – Komandante Jerál Polísia Nasionál Timor-Leste (PNTL), Komisáriu Faustino da Costa, konvoka enkontru avaliasaun jerál bá pontu importante tolu hamutuk Komandante Polísia Munisípiu, Unidade no Xefe departamentu sira iha komandu PNTL nian.

Objetivu prinsipál husi avaliasaun jerál ne’e mak atu avalia servisu Polísia nian iha ámbitu implementasaun estadu emerjénsia, preparasaun hasoru komemorasaun loron proklamasaun independénsia 28 Novembru no mós preparasaun hasoru festa natál no tinan foun.

“Ami halo avaliasaun jerál ida ké involve Munisípiu hotu-hotu, Unidade sira no mós Gabinete Xefe servisu sira iha komandu ne’e. Iha enkontru ne’e assuntu importante tolu mak ami foti. Ida avaliasaun servisu durante estadu emerjénsia nian mai to’o agora, segundu haree mós preparasaun Polísia Nasionál nian oinsá atu asegura atividade 28 Novembru ne’ebé atu selebra iha tempu badak, ajenda ida ikus mak preparasaun bá natál ho tinan foun nian,” dehan Komisáriu Faustino da Costa, iha Komandu PNTL, Dili, Tersa-feira ne’e.

Durante enkontru, Komandante Polísia Munisípiu ho Unidade sira mós aprezenta situasuan jerál iha territóriu Timor laran tomak la’o di’ak, maske sei iha akontesimentu ki’ik-oan balun, maibé la afeta bá movimentu populasaun sira-nian.

“Komandu Munisípiu no Unidade sira aprezenta situasaun anivel territóriu nasionál la’o di’ak, loos duni iha semana ida rua liu bá iha akontesimentu balun hanesan mós iha kapitál Dili, maibé ida-ne’e la implika bá movimentu ein-jerál,” tenik nia.

Maibé Komandante Jerál PNTL ne’e hatutan, situasaun ne’ebé fó difikulta movimentasaun transporte públiku mak laniña ka udan iha Munisípiu no postu administrativu hodi halo estrada kotu inklui liña eletrisidade mate kuaze oras 24 nia laran.

Entretantu, liu husi reuniaun ne’e, Komandu PNTL mós hatun diretiva bá Komandu Munisípiu no Unidade sira, tanba PNTL mós sei involve iha parada 28 Novembru nian.

Alem de ne’e, PNTL garante nafatin seguransa seguransa durante selebrasaun 28 Novembru, nune’e mós kontinua halo pasa revista bá veíkulu iha ámbitu natál no tinan foun, no mós kontrola sasán ne’ebé tama sai iha fronteira.(ant)