Polísia Tránzitu Sei Blokeia Estrada Públiku Husi Diresaun 3 Durante Loron 2

Smnewstl.com 10-11-21 (Dili) – Polísia Nasionál Timor-Leste (PNTL) liu husi tránzitu nasionál sei blokeia estrada públiku iha kapitál Dili durante loron rua hahú husi dia 11 to’o 12 novembru iha ámbitu komemorasaun loron Masakre Santa Kruz 12 Novembru.

Komandante Tránzitu Munisípiu Dili, Inspetór Polísia Domingos Sarmento Gama informa, taka estrada públiku hanesan tinan-tinan komesa husi diresaun Ponte My Friend tun bá semitériu Santa Kruz, Balide no mós Audian sa’e bá santa Kruz hodi fo biban ba serimonia ne’e.

“Komemorasaun 12 Novembru kada tinan ne’e ninia atividade hanesan, bá estrada públiku ne’ebé mak ita sei blokeia hanesan mós tinan-tinan ita halo aniversáriu, parte ida ponte my friend nian tun mai ita taka, estrada audian nian sa’e bá rate santa kruz ita sei taka hanesan,” dehan Inspetór Polísia Domingos Gama, kuarta ne’e iha Komandu Polísia Munisípiu Dili.

Komandu PNTL Munisípiu Dili prepara ona planu operasaun, tan ne’e sei tun bá observa estrada públiku ne’ebé sei taka durante loron rua ne’e.

Alem de ne’e, husu mós kondutór transporte públiku liu-liu mikrolete 01, 07 ne’ebé liu husi santa kruz nia oin, atu buka diresaun seluk ne’ebé laiha engerafamentu, nune’e bele halo sirkulasaun ho lívre.

“Ne’ebé bá dalan sira-ne’ebé ita sei blokeia ne’e, ita apelu bá ita-nia komunidade sira-ne’ebé mak hela iha kapitál Dili, parese dia 11 to’o dia 12 ita sei blokeia dalan sira, tanba dia 11 halo ona preparasaun tenda. Tanba ne’e, karik kondutór sira-ne’ebé uza transporte públiku bele hola diresaun sira-ne’ebé lívre hodi sira bele halo movimentu,” dehan nia.

Entretantu, Komandu Polísia Munisípiu liu-liu seksaun tránzitu sei koloka membru hamutuk ema na’in 70 hodi fó seguransa, durante komemorasaun loron masakre santa kruz 12 novembru.(ant)