Polísia La Tolera Joven Hemu Tuano Dansa Iha Prejépiu Laran

Smnewstl.com 14-12-21 (Dili) — Polísia Nasionál Timor-Leste (PNTL), la tolera joven sira atu hemu tua no dansa iha prejépiu laran iha selebrasaun festa natál iha dia 25 dezembru 2021 no tinan foun 2022.

Porta-voz PNTL, Superintendente Xefe Arnaldo de Araújo hateten, PNTL sei la autoriza komunidade no joven sira atu fa’an fugetis no sunu paixon durante komemorasaun festa natál ho tinan foun.

“Ida-ne’e PNTL sei atua makas bá ema sira-ne’ebé mak hatama sasán sira hanesan fugetis, paixon, tanba ita hotu hatene katak, iha akontesimentu balun ne’ebé mak iha ema lori tama mai Dili, konsege Munisípiu Likisá ka’er, UPF sira ka’er iha Batugade ne’e hatudu katak, ita-nia nasaun ida-ne’e liu husi PNTL sei atua makas bainhira ema hakarak hatama sasán sira-ne’e,” dehan Superintendente Xefe Arnaldo de Araújo iha Kuluhun, Dili, tersa ne’e.

Porta-voz PNTL ne’e apela bá, atu labele prejépiu iha trotoar leten no estrada ninin, tanba trotora ne’e fatin bá ema la’o ain sira, maibé, bele halo dok metru 50 husi estrada no trotoar.

“Husu mós bá komunidade sira bainhira hakarak halo prejépiu, iha trotoar no dalan ninin Polísia sei la autoriza, tanba ne’e sei fó impaktu bá ema-nia movimentu la’o ain iha trotoar ne’e. Husi trotoar bá sira-nia kintál laran 50% sira bele halo prejépiu. Iha prejépiu laran, husu par labele loke múzuka dangdut, múzika pop sira-ne’e ne’e labele, sé bele loke de’it múzika natál nian,” afirma nia.(ant)