Polísia La Nonok ba Bá Kazu Bidau Masaur, Kontinua Buka Tuir Autor

Smnewstl.com 29-11-2021 (Dili) – Komandante Polísia Munisípiu Dili, Superintendente Xefe Henrique da Costa afirma, Polísia Nasionál Timor-Leste (PNTL) kontinua buka tuir autór sira-ne’ebé mak involve iha kazu konfrontu iha Bidau Masaur.

Superintendente Xefe ne’e dehan, kazu konfrontu ne’e akontese iha festa kazamentu ida iha Bidau Masaur, maibé, Polísia konsege uza gás gan, iha ne’ebé rezulta ema ida kanek, maibé, Polísia lori kedas bá halo tratamentu iha Ospitál Naisonál Guidu Valadares (HNGV).

“Ita akompaña insidente ida iha Bidau Masaur, iha festa kazamentu ida, ita-nia parte Polísia patrulla husi Cristo Rei nian bá atua konsege tiru gás gan iha joven ida mak kanek, ita-nia parte Polísia lori kedas bá iha ospitál nasionál, atu nune’e hetan tratamentu,” dehan Superintendente Xefe Henrique da Costa, iha servisu fatin Komandu Polísia Munisípiu, Dili, Segunda ne’e.

Henrique hatutan, parte servisu intelijénsia no investigasaun Polísia, nafatin buka tuir autór bá kazu ne’e, inklui buka mós motivu husi kazu refere.

Alem de ne’e, Komandu Polísia Munisípiu Dili, entrega ona kazu ne’e bá Polísia Eskuádra Cris Rei atu atende kazu ne’e.

“Ita-nia parte intelijénsia ho investigasaun nafatin buka tuir autór sira, no ita sei buka tuir motivu husi akontesimentu ne’e saida, tanba iha festa kazamentu depois de iha madrugada mosu insidente ne’e, ne’ebé ita-nia parte patrulla hamutuk ho investigasaun buka tuir hela,” tenik nia.

Nune’e mós, Superintendente Xefe Henrique da Costa relata han katak, kazu ne’ebé akontese iha loron 26 fulan Novembru foin lalais ne’e, Polísia Eskuádra Vera Kruz konsege kaptura autór na’in 4 ne’ebé involve iha kazu insidente ne’e.

Autór sira dehan Henrique, oras ne’e daduak entrega ona bá Eskuádra Polísia Vera Kruz atu halo prosesu investigasaun.(ant)