PNTL Rejista Kazu Insidente 30, Asidente 26 no Na’in 2 Lakon Vida

Smnewstl.com 30-08-2021 (Dili) — Hahú iha dia 14 to’o dia 31 fulan Agostu tinan 2021 ne’e, Polísia Nasionál Timor-Leste (PNTL) rejista kazu insidente hamutuk 30, asidente 26 na’in 2 lakon vida no mós movimentu ilegál iha fronteira terrestre hamutuk 153.

Porta-voz PNTL, Superintendente Xefe Arnaldo de Araújo informa, kazu insidente ne’ebé akontese iha fulan Agostu ne’e hamutuk 30 no ida mak ahi han uma.

Nune’e mós, kazu konflitu balun ne’ebé akontese iha Tirilolo Munisípiu Baucau, iha ne’ebé rezultadu ema na’in 4 kanek.

“Iha dia 14 to’o dia 31 de Agostu 2021, kazu insidente hamutuk 30, asaltu malu 29, ahi han uma ida, ne’ebé mak akontese durante ne’e, hakarak hatete tan, iha dia 29 de Agostu 2021 oras 15:30 iha akontesimentu ida-ne’ebé mak mosu Baucau Tirilolo rezulta ema na’in ha’at kanek, suspeitu ho naran inisiál VFB, vítima ho naran inisiál JUB, ida inisiál NFB, sira-ne’e mosu problema, tanba kauza husi alkohol iha tempu ne’ebá rezulta ema na’in 4 kanek,” dehan Arnaldo de Araújo, iha Komandu Jerál PNTL, Tersa ohin.

Oras ne’e dadauk, suspeitu detein hela iha sela detensaun eskuádra vila Baucau, enkuantu vítima sira lori ona bá ospitál, maibé suspeitu hein prosesu investigasaun tuir mai atu enkamiña bá Ministériu Públiku.

Iha parte seluk, iha mós kazu insidente baku malu iha postu administrativu Laklubar munisípiu Manatutu, iha ne’ebé hakanek ema na’in 2.

“Segundu mós iha dia 29 de Agostu 2021 17 oras iha akontesimentu ida iha área Bahareduk aldeia Areain postu administrativu Laklubar, akontesimentu ne’e rezulta vítima ida kanek ho inisiál LP ne’ebé mak kronolojia ne’e uma-mane, mane foun sira ataka malu no baku malu, tanba de’it liafuan la kona malu, suspeitu mós agora dadauk iha hela prosesu investigasaun, vítima na’in 2 ne’ebé kanek lori bá ospitál agora dadauk iha hela uma hodi hein prosesu tuir mai,” subliña nia.

Alem de ne’e, PNTL mós rejista kazu tráfiku hahú husi loron 14 to’o loron 31 fulan Agostu ne’e hamutuk 26, maibé feto ida ho mane ida mak lakon vida, seluk balun kanek kaman no balun kanek todan.

“Bá kazu tráfiku ne’ebé mak hahú iha dia 14 to’o dia 29 de Agostu 2021 hamutuk 26 kazu asidentes, mate 2, ida mane ida feto, sira seluk ne’e kanek kaman, balun kanek todan agora dadauk rekopera hotu ona sira-nia saúde, balun iha uma balun sei iha ospitál,” subliña nia.(ant)