PNTL Preparadu ba Seguransa Selebrasaun Festa Natal ho Tinan Foun, Zero Toleransia ba Kriminozu

Smnewstl.com 22-12-21 (Dili) — Polísia Nasionál Timor-Leste (PNTL) preparadu hodi fó seguransa bá komunidade sira durante selebrasaun festa natál ho tinan foun to’o loron 4 fulan Janeiru tinan 2022.

Komandante Jerál PNTL, Komisáriu Faustino da Costa, Kuarta-Feira ne’e, hala’o abertura bá parada prontidaun (show force) hodi garante siguransa bá selebrasaun natál ho tinan foun iha Unidade Espesiál Polísia (UEP), Bairru-Pite, Dili.

Partisipa iha parada prontidaun ne’e kompostu husi UEP Unidade Patrullamentu Fronteira (UPF), Unidade Polísia Marítima (UPM), Tránzitu, eskuádra Polísia no seluk tan.

Komisáriu Faustino da Costa hateten, objetivu parada prontidaun ne’e atu fó orientasaun no fahe tarefa servisu bá komandante munisípiu ho unidade sira hodi fó seguransa bá komunidade sira iha ámbitu selebrasaun natál ho tinan foun nian.

“Iha tinan 2021 Komandu deside hala’o iha kapitál Dili, nune’e parada prontidaun ida-ne’e atu bele orienta no mós fahe tarefa servisu bá komandante munisípiu no mós unidade apoiu sira la’ós de’it iha kapitál nasionál, maibé mós bá iha munisípiu inklui atu asegura fronteira rai maran no mós fronteira tasi,” dehan Komisáriu Faustino da Costa, iha diskursu hafoin halo pasarevista bá parada iha UEP Bairru-Pite, Dili, kuarta ne’e.

Komandu PNTL mós sei la autoriza membru sira atu konsumu uluk tua molok hala’o servisu hodi fó seguransa bá komunidade atu festeza natál no tinan foun.

“Katak iha tempu atividade maske ema barak sei festeza natál no tinan foun, PNTL nia membru nia membru sira garante katak, festeza sira-ne’e la’o di’ak, la’ós membru sira PNTL nian mak involve iha aktus balun, liu-liu aktus sira-ne’ebé hanesan, molok hala’o atividade konsumu uluk alkohol (rua) ida-ne’e sei la autoriza,” apela Komisáriu Faustino.

Bá membru sira-ne’ebé mak atu husik hela fatin servisu tanba nesessidade urjente, tenki informa bá Komandu hodi hetan autorizasaun molok halo deslokasaun.

Faustino da Costa afirma, PNTL iha dever no obrigasaun atu asegura nafatin implemetasaun medidas prevensaun no medidas protokolares saúde bá prevensaun Covid-19.

Sorin seluk, Komandante Operasaun Nasionál, Superintendente Xefe Pedro Belo afirma, PNTL prontu ona atu asegura seguransa bá loron natál no tinan foun, tan ne’e sei la tolera kriminozu sira-ne’ebé hakarak atu kria instabailiade durante natál no tinan foun.

Pedro Belo hatutan, ikus-ikus hahú mosu problema balun ne’ebé komunidade sira sente la seguru.

“Tanba ne’e mak ohin loron PNTL hatudu nia forsa katak, prontu asegura seguransa bá iha loron boot natál no tinan foun, PNTL durante semana-rua nia laran, sei la tolera bá kualkér kriminozu no kualkér krimi ne’ebé mak impede atividade ne’ebé komunidade sira hala’o iha loron beik mai,” afirma Pedro Belo.

Superintendente Xefe Pedro Belo apela bá komunidade sira-ne’ebé hakarak halo festa karik bele halo iha sira-nia uma laran, maibé labele halo iha fatin públiku hodi impede fali ema seluk nia direitu no atividade.

Bainhira Komandu PNTL tantu iha nasionál no Munisípiu mak simu keixa husi sidadaun sira katak, sira-nia direitu ema seluk viola, maka PNTL sei halo atuasaun.

Entretantu, partisipa iha serimónia parada prontidaun ne’e, estrutura tomak PNTL nian, Komandu PNTL Munisípiu no unidade sira inklui membru sira hotu.

Hafoin remata pasarevista bá parada prontidaun, membru PNTL kompostu husi Unidade sira hanesan UEP, UPF, UPM, Tránzitu no seluk, hala’o konvoi haleu sidade Dili hodi fó seguransa bá komunidade sira iha ámbitu selebrasaun natál no tinan foun ne’e.(ant)