Smnewstl.com 15-02-2022 (Dili) — Timor-Leste Police Development Program (TLPDP), realiza semináriu hodi durante loron rua apoiu treinamentu kona-ba Norma Operasionál Prosedur (NOP) atuasaun uza forsa nian bá membru PNTL sira hodi asegura seguransa durante kampaña eleisaun prezidensiál.
Segundu Komandante TLPDP, Mark Silvertand hateten, TLPDP mak parseiru ne’ebé besik liu hodi apoiu PNTL liu-liu kona-ba prodús material treinamentu ligadu ho NOP foun uza forsa nian.
“Apoiu TLPDP nian liga bá atividade workshop loron rua ne’e, apoiu kona-ba prodús material treinamentu nian ne’ebé liga bá NOP foun liu-liu kona-ba uza forsa nian ne’ebé mak sei fó treinu bá PNTL sira atu bele responde bá iha pre-eleisaun kampaña ne’ebé mak sei realiza iha tempu tuir mai,” dehan Segundu Komandante TLPDP, Mark Silvertand, iha salaun Maubara Room Timor Plaza, Tersa ne’e.
NOP foun ne’e, membru PNTL sira hotu presiza hetan treinamentu liu-liu uza arma de fogu ka NOP, nune’e sira bele hatene oinsá atu halo atuasaun uza forsa, bainhira mosu problema ruma durante kampaña.
Sorin seluk, Komandante Operasaun Nasionál PNTL, Superintendente Xefe Pedro Belo hateten, treinamentu uza forsa durante ne’e PNTL halo ona Komandu Polísia Munisípiu 13 no mós Unidade Espesiál Polísia (UEP), Unidade Polísia Marítima (UPM) no Unidade Patrullamentu Fronteira (UPF).
“Preparasaun hirak ne’ebé mak ami halo mak treinamentu uza forsa bá iha Komandu Munisípiu 13, nune’e mós treinamentu uza forsa bá iha Komandu jerál, sentru formasaun no mós husi UPM no mós formasaun bá média PNTL sira no mós formasaun sira ne’ebé hala’o mós husi parte departamentu justisa bá membru sira iha Munisípiu 13 no mós bá unidade,” informa Pedro.
Pedro Belo hatutan, formasaun lubuk ida mak iha hela faze preparasaun atu fó kapasitasaun bá Komandante Munisípiu, Xefe Investigasaun, Xefe Operasaun Munisípiu 13 no seluk tan.
“Formasaun ne’ebé mak iha ona ne’e par hodi atu prepara fíziku mental no hasa’e kapasidade intelektuál bá komandante sira no mós bá membru sira hodi asegura seguransa iha territóriu laran tomak durante eleisaun prezidensiál 2022,” tenik nia.
Superintendente Xefe ne’e akresenta tan katak, PNTL mós prepara ona kondisaun fízika no mós kapasidade intelektuál, nune’e bele asegura kampaña to’o eleisaun bele la’o ho di’ak, atu ema hotu bele livre hodi ezerse sira-nia votu ho seguru.(ant)
Komentariu