PNTL Mobiliza Tan Forsa Apoiu Seguransa Iha Baucau

Smnewstl.com 10-11-21 (Dili) – Vise-Ministru Interiór, António Armindo hateten, Komandu Polísia Nasionál Timor-Leste (PNTL) mobiliza ona membru hodi bá fó apoiu seguransa iha munisípiu Baucau.

Iha selebrasaun loron matebian iha dia 2 novembru, mosu problema entre joven sira iha Samalari munisípiu Baucau, iha ne’ebé, rezulta joven ida mate no ida kanek, tanba tiru husi membru Ofisiál Polísia Suku (OPS) ida.

No iha semana kotuk, iha mós grupu balun asalta transporte públiku Bis iha Baucau, no tá sidadaun balun kanek, ne’ebé dadauk ne’e halo hela tratamentu iha ospitál.

Ho akontesimentu ne’e, Vise-Ministru Interiór ne’e dehan, nia orienta kedas komandu PNTL atu fó apoiu tranporte bá Komandu Polísia Munisípiu Baucau, nune’e bele uza hodi halo atuasaun bá konflitu ne’ebé akontese iha área Samalari munisípiu Baucau.

“Foin dadauk ne’e akontese ita hotu hatene katak, akontesimentu ida-ne’e halo ema hotu hanoin katak, iha Baucau ne’e iha kazu krime ne’ebé akontese barak, horseik ita hetan ona orientasaun husi Ministru Interiór par atu ko’alia hamutuk ho komandu oinsá ita garante ita-nia seguransa iha Baucau, ita komesa mobiliza tan ona ita-nia forsa seguransa bá iha ne’ebá,” dehan Vise-Ministru Interiór, António Armindo, iha nia servisu fatin Ministériu Interiór, kuarta ne’e.

Governante ne’e dehan, oras ne’e dadauk, PNTL hamutuk ho Falintil Forsa Defeza Timor-Leste (F-FDTL), hodi halo pasarevista iha fati-fatin, nune’e miniza konflitu labele akontese tan iha munisípiu refere.

“Agora dadauk operasaun ne’e la’o hela, sira halo check point iha fati-fatin, F-FDTL mós ajuda halo check point iha fati-fatin atu, ita-nia servisu sekreta sira mós bá, ne’ebé ha’u hanoin komesa ohin bá oin parese sei hakmatek,” tenik nia.

Nia garante katak, iha selebrasaun loron proklamasaun independénsdia 28 novembru ne’ebé sei hala’o iha munisípiu Baucau, sei la’o ho di’ak, tanba hetan seguransa másimu husi PNTL ho F-FDTL.(ant)