PNTL ‘Lulun’ Mos Kareta Para Arbiru Iha Areadores Palacio Governo, Inklui Governo Nian 3

Smnewstl.com 08-11-2021 (Dili) – PNTL Unidade Transito Municipio Dili liderado Inspector Domingos Gama kontinua sosializa ba publiku lei kodiku estrada estabelsidu nune’e motorista sira hotu bele hatene no kumpri.

Lei refere bandu transporte publiku atu para arbiru iha sinain hirak ne’ebe markadu ona hanesan iha areadores Palacio Governo sorin nomos edifisio Embaxada Portugal iha Timor Leste.

Komandante Transito Municipio Dili Inspector Domingos Gama ne’ebe lidera direitamente operasaun husu ba motorista sira hotu atu kumprimenta ba lei eim vigor nune’e kontribui ba kapital nasaun ho kapas no furak inklui organizado.

“Ita nia operasaun kona ba kontrolu estasionamentu iha Dili laran li-liu iha areadores Palacio Governo, Parlamentu Embaixada Portugal inklui lojas ne’ebe partensia ba Kolmera hanesan pontos prinsipais ba kapital nasaun,”dehan inspector Domingos Gama ba jornalista, Segunda-feira, (08-11-2021) ne’e.

Nia hatutan, PNTL sempre halao operasaun, maibe paragem kareta sira nafatin hela deit no laiha mudansa maske lei kodiku Estrada mensiona klaru ona atu la para arbiru iha sinais ne’ebe estabelesidu ona.

“Iha Palacio Governo ho Embaixada Portugal partensia ba liman los marka ona sinais katak, labele para. Maibe kareta kontinua para, ne’e klaru ke ita nia kondutor sira mak laiha konsiensia,”tenik Gama.

Komandante Polisia Transito Municipio Dili ne’e afirma, kona ba razaun ligado ho kareta ne’ebe para arbiru kauza husi paragem ne’ebe laiha, ne’e laos atu sai kestaun hodi ema ida-idak halao tuir deit nia hakarak.

“Ema hotu iha lei nia okos, tamba ne’e ita hotu tenki obdese ba lei ne’ebe iha,”nia sublinha tan.

Total kareta ne’ebe prende tuir Gama kuaze 20 liu inklui kareta governo nia tolu. Kareta ne’ebe para arbiru sei selu multa $ 45, maibe ne’e seidauk aumenta ho dokumentus laiha no mate inklui infrasaun seluk tan.

Atu buat hotu lao ho diak, Gama husu koperasaun entidades hotu nian hodi kopera nune’e kontribui ba ambiente kapital nasaun ida diak no kontroladu. (Rio)