PNTL Kontinua Buka Tuir Autór Oho António Iha Aimutin, Nain 5 Submete Ona ba Identifikasaun

Smnewstl.com 09-02-2022 (Dili) — Polísia Nasionál Timor-Leste (PNTL) liu husi servisu informasaun intelijénsia, kontinua buka tuir autór bá kazu omisídiu hodi halakon António de Jesus nia vida iha área Aimutin Elemloi iha segunda dader madrugada foin lalais.

Komandante Jerál PNTL, Komisáriu Faustino da Costa konfirma, prosesu investigasaun bá kazu refere la’o hela, no ema na’in 5 mak submete ona bá prosesu identifikasaun.

“Ne’ebé atu dehan de’it katak, iha kazu ida-ne’e identifikadu ema lubuk ida mak ita bolu ona prosesu la’o hela, ne’ebé fi’ar katak, liu-liu ekipa konjuntu parte informasaun nian, tantu Polísia Nasionál, SNI, J2 ka servisu informasaun militár, ekipa sira-ne’e mak halo hela servisu ida-ne’e, par fasilita informasaun sira tomak iha área investigasaun nian,” dehan Komisáriu Faustino da Costa, iha salaun City 8 Manleuana, Dili, kuarta ne’e.

Komandante Jerál PNTL, Komisáriu Faustino da Costa mós apela bá públiku atu labele fahe fotigrafia ligadu ho kazu ne’ebé akontese iha tinan hira bá kotuk iha média sosiál ka facebook tanba ne’e bele hatauk ema.

“Soke iha buat ida atu aproveita de’it apela bá públiku katak, dalaruma kazu balun ne’ebé akontese pasadu ne’e, ema tenta aproveita situasaun ne’ebé iha, publika fila-fali informasaun sira-ne’e, husu atu evita ida-ne’e, tanba ida-ne’e mak atu hatauk liután halo pániku liután ita-nia komunidade,” apela Faustino da Costa.

Entretantu, kazu omisídiu ne’ebé akontese hodi halakon António de Jesus nia vida ne’e iha área Aimutin Elemloi Delta nian, iha segunda dader madrugada tuku 1 ho balun, bainhira vítima fila husi servisu fatin halo trambulan mak hetan asaltu husi ema deskoñesidu iha dalan.

Nune’e, ema deskoñesidu uza tá iha vítima António de Jesus nia kabas parte karuk no sona tan iha kanotak iha parte karuk hodi rezulta vítima mate iha fatin.(ant)