PNTL Kaptura Sidadaun Na’in 19 Iha Fatin ‘Buti Isin’

Smnewstl.com 12-10-2021 (Dili) – Polísia Nasionál Timor-Leste (PNTL) liu husi servisu investigasaun kriminál Komandu munisípiu Dili hamutuk ho Sentu Integradu Jestaun Krize (SIJK) iha loron, 9 fulan Outubru, tuku 10:15 kalan, halo operasaun bá fatin ne’ebé diskonfia prátika atividade prostituisaun.

Komandante Polísia Munisípiu Dili, Superintendente Xefe Polísia Henrique da Costa informa, ekipa konjunta kaptura sidadaun na’in 19 ne’ebé maioria sidadaun Indonézia inklui Timoroan balun, hodi halo identifikasaun bazeia ba informasaun ne’ebe simu.

Iha prosesu identifikasaun, PNTL la detetak prátika prostituisaun iha fatin buti-isin refere, maibé, identifika sidadaun na’in 19 ne’ebe viola de’it oras servisu nian, tanba tuir loloos, oras servisu hahú dader tuku 8 to’o tuku 7 kalan, maibé to’o tiha kedas tuku 12 kalan.

“Bainhira ita halo operasaun bá iha ne’ebá identifika katak, laiha prostituisaun, soke kompañia ne’ebé halo prátika ida-ne’e viola de’it regras.

Tuir lolos, atividade to’o de’it iha tuku 7 kalan, maibé sira implementa to’o kedas iha tuku 12 kalan,” dehan Superintendente Xefe Polísia Henrique da Costa iha servisu fatin Komandu Polísia Munisípiu Dili, tersa ohin.

Henrique dehan, bainhira remata prosesu identifikasaun, parte servisu investigasaun kriminál Munisípiu Dili sei kopera ho servisu imigrasaun, nune’e bele haree vístu husi sidadaun estranjeiru sira-nian.

“Ida-ne’e ita halo identifikasaun de’it, ita mós halo kooperasaun ho parte imigrasaun, atu nune’e bele haree mós kona-ba sira-nia vístu traballau ga turísta ninian, tanba ita lori mai halo identifikasaun ita mós koloka ita-nia parte informasaun iha ne’ebá la detekta,” dehan nia.

Fatin buti-isin ne’e lokaliza iha área Fatuhada postu administrativu Don Aleixo munisípiu Dili, iha ne’ebé traballadór sira-ne’ebé servisu iha fatin refere kompostu husi sidadaun Indonézia, inklui timoroan balun.(ant)