PNTL Investiga Hela Inséndiu Merkadu Manleuana

Smnewstl.com 14-02-2022 (Dili) — Polísia Nasionál Timor-Leste (PNTL) Munisípiu Dili, halo hela investigasaun bá kazu inséndiu iha merkadu Manleuana.

Inséndiu ne’e akontese iha loron 14 fulan Fevereiru 2022 iha tuku 6 dader, tanba sirkuitu husi liña eletrisidade, nune’e rezultadu baraka 35 vendedór sira-nian hodi fa’an Obralan ahi han mutuk.

Komandante PNTL Munisípiu Dili, Superintendente Xefe Henrique da Costa informa, PNTL bolu ona vítima sira bá iha eskuádra Polísia Dom Aleixo hodi presta deklarasaun, nune’e bele hatene kauza husi inséndiu ne’e rasik.

“Investigasaun la’o hela, vítima sira agora dadauk iha hela eskuádra Dom Aleixo, atu nune’e ita rekolla informasaun kona-ba inséndiu ne’e akontese tanba saida,” dehan Superintendente Xefe Henrique da Costa, iha knár fatin Komandu Polísia Munisípiu Dili, segunda ne’e.

Hafoin akontese inséndiu ne’e, parte Polísia kontaktu kedas Bombeirus hodi bele hamate ahi.

“Ita-nia parte informasaun mós la’o hela, par atu nune’e nafatin buka tuir informasaun ruma liga mós bá iha inséndiu ne’e,” tenik nia.

Tan ne’e, Henrique da Costa husu bá komunidade sira bainhira atu halo instalasaun eletrisidade tenki informa bá tékniku Eletrisidade de Timor-Leste Empreza Públika (EDTL,ep) atu bele instala, nune’e labele mosu sirkuitu atu ahi han uma no seluk tan.(ant)