PNTL Detein Ona Suspeitu Tiru Mate Joven Iha Baucau

Smnewstl 03-11-2021 (Dili) – Iha loron 1 fulan novembru tinan 2021 iha oras 19:00, mosu insidente entre joven sira iha suku Samalari, Postu Administrativu Baucau Villa, Munisípiu Baucau ne’ebé rezulta joven ida ho inisiál MC idade 21 mate fatin no seluk ho inisiál BSNF hetan kanek iha ain.

Ba kazu ne’e, Porta-voz Polísia Nasionál Timor-Leste (PNTL), Superintendente Xefe Arnaldo de Araújo relata, suspeitu ho inisiál FCS ne’ebe diskumfia tiru detein ona iha sela Polísia Munisípiu Baucau durante oras 72 hodi aprezenta bá munistériu públiku, nune’e submete bá primeiru interrogatóriu iha tribunál distritál Baucau.

“Loos duni iha loron 1 fulan-novembru 2021 oras 19:00 otl iha suku samalari postu administrativu Baucau villa akontese insidente ida ne’ebé rezultadu joven na’in-rua sai vítima ida mate no ida seluk kanek. Diskonfia suspeitu ho inisiál FCS agora dadauk iha ona munisípiu Baucau hodi halo prosesu tuir mai,” dehan Superintendente Xefe Arnaldo de Araújo, iha komandu jerál PNTL, kinta ne’e.

Vitima ho inisiál MC tinan 21 ne’ebe lakon vida ne’e husi Seixal munisípiu Baucau, no vítima ne’ebé kanek ho inisiál BSNF husi suku samalari.

Superintendente Xefe Arnaldo de Araújo haktuir, bainhira mosu problema, Polísia Munisípiu Baucau to’o kedas iha fatin akontesimentu hodi haloa atuasaun, iha ne’ebé konsege asegura suspeitu, tanba fragante delitu.

“Atuasaun polísia nian iha momentu ne’ebá, polísia Baucau to’o kedas iha fatin incidente rekolla kedas informasaun no asegura kedas suspeitu lori bá tama iha detensaun, tanba iha momentu ne’e iha fragante delitu. Enkuantu mate isin vítima ne’ebé mate ne’e lori kedas mai iha ospitál guidu valadares iha mortuáriu hodi hein otópsia hodi bele hatene kauza loloos kona-ba mate ne’e,” dehan nia.

Arnaldo de Araújo dehan, komandu PNTL seidauk bele fó sai loloos motivu husi akontesimentu ne’e, tanba prosesu investigasaun sei la’o hela.

Nia hatutan, Servisu Investigasaun Kriminál Nasionál (SIKN) desloka ona bá munisípiu Baucau hamutuk ho servisu investigasaun Municipal hodi halo rekonstrusaun bá fatin akontesimentu, nune’e bele rekolla informasaun atu kompleta evidénsia hafoin aprezenta bá munistériu públiku.

“Kazu ne’e agora dadauk submete ona bá iha munistériu públiku Baucau hodi hein aprezenta primeiru interrogatóriu iha tribunál distritál Baucau. Motivu bá kazu ida-ne’e sei iha hela prosesu nia laran, ekipa investigasaun nasionál agora dadauk iha ne’ebá par hodi hamutuk ho investigasaun distritál rekolla informasaun par hatene loloos motvu bá kazu ida-ne’e,” relata nia.

Maski nune’e, Porta-voz PNTL ne’e hatutan, tuir informasaun ne’ebé komandu jerál PNTL simu husi xefe operasaun SIKN nian katak, kazu refere laiha relasaun ho grupu artes marsiais.

Kona-ba informasaun ne’ebé dehan, vítima ho inisiál MC tinan 21 ne’ebé diskonfia membru PNTL ida husi Ofisiál Polísia Suku (OPS) mak tiru mate.

Arnaldo dehan, komandu seidauk bele suspeita suspeitu ne’ebé halakon vítima MC nia vida, tanba ne’e tribunal mak iha kompeténsia atu suspeita autór sira-ne’ebé mak involve iha kazu refere, maibé oras ne’e dadauk, Polísia investigasaun Baucau ho SIKN sei kontinua rekolla hela informasaun sira iha terenu.(ant)