PNTL Avalia Oferta Husi Parseiru Dezenvolvimentu

Smnewstl.com 09-02-2022 (Dili) — Komandante Jerál PNTL Liderado Polísia Komisáriu Faustino da Costa diskuti Quarta-feira ne’e ho parseiru dezenvolvimentu kona-ba apoiu sira-ne’ebé durante ne’e doador oferese ba PNTL.

Komandante Jerál PNTL, Komisáriu Faustino da Costa informa, enkontru ne’e ho objetivu atu uniformiza apoiu ne’ebé oferese husi doador sira, nune’e apoiu husi parseiru sira-ne’e labele dupla.

“Instituisaun PNTL iha departamentu própriu ne’ebé haree kona-ba apoiu parseiru nian, tanba ne’e mak ita realiza objetivu ida tan katak, atu uniformiza par apoiu husi doador sira-ne’e mai keta iha dupla,” informa Komisáriu Faustino da Costa, iha salaun City 8, Manleuana Dili, kuarta ne’e.

Desde instituisaun PNTL ejiste, parseiru sira sempre fó apoiu iha área importante rua mak hanesan kapasitasaun bá membru sira no mós dezenvolvimentu infraestrutura.

“Desde PNTL ejiste, apoiu sira-ne’e mós mai kedas iha tempu ne’ebá to’o ohin loron. Sira iha área importante rua. Ida mak área kapasitasaun depois ida mak área dezenvolvimentu infraestrutura,” subliña nia.

Komandante Jerál PNTL ne’e hatutan, laiha parseiru ida mak fó apoiu makas liu sira seluk, tanba maioria dordor sira fó apoiu hanesan de’it bá PNTL.

Fatin hanesan, Xefe Departamentu Administrasaun Planeamentu Komandu PNTL, Superintendente Calisto Gonzaga reforsa, enkontru ho doadores sira-ne’e atu halo koordenasaun entre PNTL ho parseiru sira, nune’e komandante PNTL bele aprezenta programa prioridade PNTL nian ne’ebé la konsege hatama iha tetu fiskál Orsamentu Jerál Estadu (OJE) 2022 nian.

“Reuniaun koordenasaun entre Polísia ho parseiru dezenvolvimentu nasionál ne’ebé iha Timor. Iha okaziaun ne’e, ita aprezenta programa prioridade instituisaun Polísia nian ne’ebé mak ita la konsege investe osan iha tetu fiskál 2022,” relata Calisto Gonzaga.

Superintendente ne’e akresenta, parseiru dezenvolvimentu sira-ne’e, tinan barak ona mak fó apoiu bá PNTL la’ós foin apoiu.

Tan ne’e, iha okaziaun ne’e, atu inisia aprezentasaun programa sira hodi informa bá parseiru sira kona-ba nesesidade no prioridade ne’ebé iha atu dezenvolve instituisaun PNTL sai di’ak liután.(ant)