PNDS Rehabilita Ona Sede Suco 146 Iha Teritorio Nacional

Smnewstl.com 08-11-2021 (Dili) – Sekretariadu Tékniku Programa Nasionál Dezenvolvimentu Suku (PNDS) konsege halo ona reabilitasaun bá sede suku hamutuk 146 iha territóriu Timor laran tomak.

Diretora Nasionál PNDS, Claudina Soares Pinto hateten, Sede Suku ne’ebe rehabilita balun konstroi desde kedas tempu okupasaun no balun fali iha 2006.

“Iha tinan kotuk, PNDS hahú ona halo reabilitasaun bá sede suku hamutuk 146, ita kontinua halo reabilitasaun bá iha 88 sede suku ne’ebé tama iha faze segundu nian iha territóriu Timor laran tomak,” informa Diretora Nasionál PNDS, Claudina Soares Pinto, hafoin remata enkontru ho PM Taur iha Farol, Dili, Segunda ne’e.

Posibilidade tinan oin, PNDS sei reabilita tan sede suku 200 iha territóriu Timor laran tomak, bainhira governu kontinua aloka orsamentu bá PNDS nune’e bele garante kondisaun dignu bá xefe suku sira hodi halo servisu di’ak liután bá populasaun sira.

“Possível iha tinan oin sé enkuantu PNDS sei nafatin hetan orsamentu alokadu ita sei termina 200 sede suku par atu bele garante katak, suku hotu-hotu iha territóriu Timor laran tomak halo ona reabilitasaun, tanba suku hotu-hotu iha territóriu Timor laran tomak liu-liu 442 sukus ne’ebé nia konstrusaun ne’e balun halo kedas iha bapa nia tempu, balun halo iha 2006,” dehan Claudina.

Atividade prinsipál seluk ne’ebé PNDS implementa ona, Diretora Nasionál PNDS ne’e dehan, iha programa importante tolu mak Sekretariadu Tékniku PNDS konsege implementa ona husi orsamentu rihun $ 38 dólar amerikanu husi orsamentu estadu 2021.

Atividade prinsipal tolu ne’e mak hanesan, PNDS regular, reabilitasaun sede suku no mós PNDS regular hodi implementa atividade PNDS iha suku 250 atu responde bá iha infrastrutura bázika.

Tanba iha tinan ida-ne’e, governu aloka oan rihun $ 8 ne’ebé dadauk ne’e tama ona iha faze implementasaun projetu infrastrutura bázika iha suku 202 iha setór hanesan, água no saneamentu, edukasaun, saúde, ponte, estrada no kontrolu seias.

Atividade ida seluk maka, nafatin ho atividade PNDS regular, ne’ebé hetan apoiu fundus rihun $ 7.4 husi parseiru dezenvolvimentu DFAT husi Austrália hodi implementa atividade PNDS nian iha suku 250 hodi responde bá infraestrutura bázika.(ant)