PN Bolu Francisco Monteiro Esplika Esplorasaun Petrolífera Iha Kosta Sul

Smnewstl.com – Komissaun D Parlamentu Nasionál ba Assuntu Ekonomia no Dezenvolvimentu bolu Ministru Petróleu no Rekursu Minerais, Francisco da Costa Monteiro, hodi apresenta prespektiva kona-ba husi explorasaun petrolífera husi empreza Timor Resources ho TIMOR GAP, iha Kosta Súl.

“ Ami husu señor Ministru atu aselera servisu sira ne’e, hodi produz reseita mai ita-nia rain iha tempu badak, iha komisaun D ami la iha opozisaun, ami iha komprimissu ba povu no rai ida ne’e, la iha opozisaun, apoiu politiku sein reserva, hodi governu bele halo servisu iha tempu besik” Deklara Prezidente Komissaun D Ricardo Baptista.

Tuir Ministru Ministru Petróleu no Rekursu Minerais, projektu Kosta Súl importante no governu kompromete atu dezenvolve di’ak liu tan.

“Bele dehan katak, investimentu ida iha rai maran, investimentu pioneiru, ne’ebé di’ak ema tau osan ona to’o 70 milloes, sempre iha dezafiu balun, sempre iha nia problema balun ne’ebe mosu hela, maibe husi parte governu iha kompromissu atu buka solusaun di’ak para la’o ba oin,” Deklara Ministru Petróleu no Rekursu Minerais, Francisco da Costa Monteiro.

Dadaun ne’e, empresa Timor Resource halo hela perfurasaun ba posu petróleu iha Feto Kmaus, Liurai no Lafaek, Munisípiu Covalima no exekutivu buka hakle’an tan informasaun, hodi dezenvolve iha tinan hirak mai.

Kona-ba prioridade ba loron 120, governu konstitusionál dasia hakarak halo re-estruturizasaun iha setor petróleo no minerais, re-estabelese negosiasaun ho Austrália no kompaña sira, hodi bele finaliza Petrolium Mining Code, Tax Regime no Production Sharing Contract, hodi loke dalan ba Kadoras mai Timor.

Projektu Kosta Sul sempre sai hanesan prioridade husi governu atuál, hodi hamoris atividade ekonómika, kriasaun empregu no hadi’a gradualmente kualidade moris sidadaun nian.(smnews)