Smnewstl.com— Primeiru-Ministru (PM), Kay Rala Xanana Gusmão hala’o vizita bá Ataúro iha sábadu (18/01/2025) no durante serimónia bem-vindo, autoridade sira Ataúro nian hato’o preokupasaun liu-liu kona-bá infraestrutura bázika.
Vizita ida-ne’e iha ámbitu jogu amizade entre ekipa voleiból feto-mane hosi AD SLB no hosi Zona Mesak Ataúro.
Primeiru-Ministru hateten, Ataúro sei la‘o bá oin, no tinan ida-ne’e Xefe Governu sei la’o hale’u Timor tomak tanba problema boot maka ida-ne’e duni.
“Ita hakarak desentralizasaun, maibé ita la prepara ema, entaun ne‘e problema. Ita tenke prepara duni rekursu umanu atu bele jere osan Estadu ne‘e ho di‘ak iha munisípiu ida-idak no evita korrupasaun,” Primeiru-Ministru hateten iha salaun Administrasaun Vila Maumeta, sábadu (18/01/2025).
Bainhira alarga bá desentralizasaun, Primeiru-Ministru dehan presiza ema atu servisu ho integridade, onestidade no servisu di’ak atu bele halo buat ruma bá povu no bá rai ida-ne‘e.
Tanba ne’e maka Xefe Governu hameno bá Ataúro-oan sira hodi prepara-an iha área hotu-hotu, tenke preparadu atu halo planu iha área saúde, edukasaun, turizmu, ekonomia, agrikultura, pekuária, kultura inklui desportu no seluk-tán hodi dezenvolve.
Iha fatin hanesan, Prezidente Autoridade Administrativa Ataúro, Mateus Belo haksolok no fó apresiasaun bá prezensa Primeiru-Ministru, tanba ne’e lori autoridade no komunidade Ataúro tomak hato’o vem vindo, maski ne’e la’ós vizita ofisiál, maibé komunidade kontente tebtebes.
“Ami kontente tebtebes ho Primeiru-Ministru nia prezensa tanba bele haree direta ami-nia estrada iha vila laran. Ami hatene katak, Primeiru Ministru rasik mak kaer hela fundu bá infraestrutura. Ami iha-ne’e, dalan iha vila laran mak hanesan ne’e ona, sá tán bá suku sira,” Mateus Belo hateten.
Mateus Belo iha esperansa katak, iha ajenda vizita ofisiál iha tinan ida-ne‘e, bainhira Primeiru-Ministru vizita iha Ataúro, autoridade sira sei ko‘alia barak liu kona-bá dezenvolvimentu iha suku, inklui infraestrutura.
Iha oportunidade ne’e, Mateus Belo hato’o parabéns bá Ekipa Voleiból AD SLB Feto ne’ebé okupa primeiru-lugar iha Liga Voleiból Timor-Leste (TL) 1ª Divizaun – 5ª Edisaun, no ho vizita Primeiru-Ministru nian lori motivasaun bá atu nune‘e tinan oin ekipa Zona Mesak sei hada’u fali primeiru-lugar hosi AD SLB.
“Maibé ami nia infraestrutura bá desportu nian mak susar tebtebes, tanba ne‘e ami kontente tebtebes tanba Primeiru-Ministru mai iha ne‘e lori prezente murak ida maka kampu multifunsaun ho kampu futeból ne‘ebé di‘ak tebes. Ami-nia kondisaun iha-ne‘e durante ne‘e joven sira joga de‘it iha fatuk laran, tanba kampu la di’ak,” nia aprezenta.
Maski kondisaun hanesan ne’e, maibé Ataúro mós hakarak kompete ho sira iha nasionál, hanesan foin lalais ne‘e feto okupa kuartu lugar no mane okupa segundu lugar iha Liga Voleiból Timor-Leste (TL) 1ª Divizaun – 5ª Edisaun.
Iha serimónia bem-vindo ne’e marka prezensa hosi Sekretária Asuntu Planeamentu, Investimentu no Dezenvolvimentu Integradu, Vicente Sanches Soares, Sekretária Asuntu Administrasaun no Finansas, Victoria da Costa Gomes, autoridade lokál sira, Pároku Ataúro Padre Guido Pereira, Polísia Nasionál Timor-Leste (PNTL), FALINTIL Forsa Defeza Timor-Leste (F-FDTL) destakadu, jogadór sira hosi ekipa Feto-mane AD SBL ho Zona Mesak no komunidade.(*/Smnews)
Komentariu