PM Xanana Partisipa Fórum Líder Global Iha 60° Aniversário UNCTAD

Smnewstl.com – Primeiru-Ministru (PM), Kay Rala Xanana Gusmão ohin arranka bá Jenebra-Suiça hodi partisipa Forum Lider Globál, iha 60º Aniversáriu UN Trade and Development (UNCTAD) hodi “Defini Metas Dezenvolvimentu Foun Perante Mudansa Mundu Nian” ne’ebé sei realiza durante loron tolu hahú hosi 12 to’o 14 juñu 2024.

UNCTAD hanesan Organizasaun Komérisu no Dezenvolvimentu ne’ebé sai mós hanesan organizasaun intergovernamentál ida iha Sekretariadu Organizasaun Nasaun Unidas (ONU) nian ho misaun promove interesse país dezenvolvidu sira perante komérsiu mundiál.

Iha Juñu 2024, UNCTAD selebra loron aniversáriu ezisténsia bá dala-60 iha Forum Lider Globál, “Define Dezenvolvimentu Foun Perante Mundansa Mundu Nian”.

Forum ida-ne’e reprezenta momentu importante ida, hanesan oportunidade di’ak ida atu halo reflesaun kle’an kona-bá buat ne’ebé aprende hamutuk durante dékada neen ikus no hamutuk Define Metas Dezenvolvimentu Foun bá oin.

Konferénsia ne’e sei halibur líder sira mai hosi mundu tomak, reprezentante mai hosi nasaun oioin ho interese hanesan, hotu-hotu unidus ho objetivu hanesan: atu define hikas metas dezenvolvimentu iha mundu liu-liu bem estár ema hotu-hotu nian sai nafatin asuntu prinsipál no fundamentál.

Fórum Líder Globál dekuti dezafiu no oportunidade prinsipál liga ho dezenvolvimentu sustentável, no halo advokasia bá planu polítika foun bá dimensaun globál, rejionál no lokál.

Konferénsia ne’e sei diskute mós kona-bá estratejia atu hamoris hikas kresimentu sustentável no inkluzivu hodi bele taka dezafiu sira ne’ebé aumenta bá bebeik.

Sira sei buka maneira no sentidu oinsá reforma no hametin multilateralizmu iha sékulu -21.

Durante esplorasaun estratejia foun bá dezenvolvimentu, Fórum Líder Globál sei foka liu bá iha tratamentu integradu UNCTAD nian bá komérsiu no dezenvolvimentu, inklui asuntu sira ne’ebé mak iha ligasaun bá malu entre ida ho ida seluk inklui finansas no teknolojia investimentu, no dezenvolvimentu sustentável.

Fórum ne’e partikularmente sei fó resposta bá nesesidade nasaun dezenvolvidu sira, partikularmente nasaun sira ne’ebé menus dezenvolvidu, Estadu illa kiik dezenvolvidu sira, no nasaun avansadu sira ne’ebé laiha área rai-maran.

“Defini Metas Dezenvolvimentu Foun Perante Mudansa Mundu Nian” hanesan esklamasaun ida atu bele hola asaun hodi hanoin fila-fali dezenvolvimentu iha tempu poliglobalizasaun. Iha medida ne’ebé ita halo adaptasaun hosi dezenvolve futuru ida reziliente, justu no sustentável. (*/Smnews)