PM Xanana Observa Direta Ró Peace Ark Iha Porto Dili

Smnewstl.com – Primeiru-Ministru, Kay Rala Xanana Gusmão hala’o vizita obserbasaun direita ba Ró Militár Ospitál Xina -Peace Ark 866 ne’ebé hala’o vizita mai Timor-Leste hodi fó asistensia umana ba povu Timor-Leste.

Vizita Xefe Governu ba Ró Ospitál Xina-Peace Ark 866 ne’ebé sadere iha Portu Dili, akompaña direita hosi Vice Primeiru Ministru no Ministru Koordenador Ekonomia no Ministru Turizmu no Ambiente, Fransisco Kalbudia Lay, Ministra Saúde, Élia A.A dos Reis Amaral simu direita hosi Komandante Ró Ospitál Xina-Peace Ark 866, Almirante Zhao Guangqin no Almirante Li Xike no ofisiál ho parede militár.

PM Xanana agradese ekipa mediku tomak nia domin durante semana ida fò asistensia gratuita ba povu sira ne’ebé sofre ho moras oin-oin bele vizita no hala’o tratamentu direita.

“Ha’u agradese tebes ba imi atendimentu sira ba ami nia povu, ida mak asaun umanu ne’ebé imi hala’o la’òs mai Timor-Leste, karik bele ba mòs rai sira iha Afrika ne’eba sira moris mukit liu presiza tebes asistensia umana sira hanesan ne’e,” informa PM Xanana durante konversa ho Almirante Zhao Guangqin no Almirante Li Xike ne’ebé introdus mapa mundu nian ne’ebé ekipa ba vizita ona.

Ró Ospitál Naval China Peace Ark 866 nu’udar primeiru ró militár Xina nian ne’ebé hala’o misaun umanu iha mundu ho nia naruk kuaze metru 45 ho kapasidade tonelada 10.000.

Ró ne’e iha fasilidade mediku mordernu kompleitu ho mediku hamutuk ema na’in-126 no dotor espesialista ba moras oin-oin ema na’in-40.

Komandante Ró Ospitál Xina -Peace Ark, Almirante Zhao Guangqin introdus ba Xefe Governu Xanana katak, ró ne’e hala’o ninia primeiru operasaun ba servis umanu ka fò asistensia saúde gratuita hahú tinan 2008 no dadaun ne’e hala’o ona vizita ba nasaun 43 no Timor-Leste hetan primeiru vizita iha tinan 2017 no tinan 2023.

Hosi nasaun 43 ne’ebé sira vizita kuaze fó ona asistensia mediku ba pasiente kuaze 250.000 no halo ona operasaun ba pasiente sira ne’ebé moras kuaze 1.500.

Durante vizita Timor-Leste, tuir dadus Ministériu Saúde populasaun ka pasiente sira ne’ebé hetan asistensia saúde kuaze rihun 10 liu.

Tuir planu ró ne’e ohin sai hosi Timor-Leste sei fila fali ba Xina no atraka iha ninia fatin permanente Portu Marina Militár Provínsia Zhenjiang. (Smnews)