PM Xanana Observa Direita Servisu Atendimentu HNGV no Konstrusaun Edifisio Pediatria

Smnewstl.com – Primeiru-Ministru (PM), Kay Rala Xanana Gusmão hala’o vizita hodi observa direta funsionamentu Hospitál Nasionál Guido Valadares (HNGV) nomós konstrusaun edifísiu pediátria ho kuidadu intensivu.

“Ha’u mai vizita traballu ida, mai la’ós de’it atu haree kona-bá funsionamentu ospitál nian, maibé ita hatene katak, iha ne’e ema moras iha katuas no ferik mak barak tebetebes. Haree ida-ne’e, nune’e ita bele hanoin seluk-tán. Ha’u mós mai haree fatin ne’ebé Xina kontribui hodi harii fatin ida bá pediatria nian ne’ebé sei la’o hela, kala sei lori tinan ida ka tinan ida ho balun tanba bo’ot ho nia medida andar lima,” Primeiru-Ministru hateten bá jornalista sira iha HNGV, segunda (06/05/2024).

Xefe Governu preokupa ho problema sira ne’ebé kontinua akontese iha HNGV no husu atu parte ospitál sira ordena no tau prioridade bá área espesializada sira.

“Ha’u-nia preokupasaun bo’ot liu maka, ha’u la’o bá mai iha fatin hotu-hotu, haree probelam ran mós barak, problema fuan mós barak inklui problema moras kakorok nian. Husu atu ospitál sira ne’e di’ak liu ita haree ba iha espesializada sira hanesan ida-ne’e bá iha ne’ebá no ida-ne’e bá iha ne’ebá atu labele kahur-malu fali,” Kay Rala Xanana Gusmão hateten.

Serimónia hatuur fatuk dahuluk bá projetu edifísiu foun pediátria no kuidadu intensivu HNGV hosi Primeiru Ministru (PM), Taur Matan Ruak iha VIII Governu Konstitusionál, iha kinta (26/01/2023) no alokasaun orsamentu millaun $9.3 atu kria kondisaun ida di’ak bá atende pasiente sira.

Edifísiu Pediátria no unidade kuidadu intensivu ne’ebé konstrui daudaun ho nia konstrusaun fízika ne’ebé iha, sei kompleta ho ekipamentu médiku no sala internamentu tuir kondisaun klínika ne’ebé Ministériu Saúde liu hosi HNGV planeia atu bele atende kazu krítiku, liuliu bá labarik sira nune’e bele redús númeru morbidade no mortalidade iha HNGV.

Edifísiu ho pezu andar lima ne’e konstrui hosi empreza Cina Civíl Engineering Construction Coorporation (CCECC), no uma halo iha rai ho lu’an 4300 m², sei kompleta ho kama hamutuk 327 ne’ebé sei presiza profisionál saúde hamutuk 81 to’o 163, inklui ona médiku, enfermeiru, parteira no mós espesialista sira. (*/Smnews)