PM Xanana Husu Estudante Timoroan Iha Xina Estuda Maka’as Hodi Dezenvolve TL

Smnewstl.com (HANGZHOU) – Primeiru-Ministru Kay Rala Xanana Gusmão dezafia estudante Timoroan sira ne’ebé hala’o estudu iha universidade sira iha nasaun Xina atu uza didi’ak oportunidade ne’e hodi aprende siensia ne’ebé sira hetan bele aplika iha Timor-Leste.

Xefe Governu transmite mensajen ne’e durante hala’o enkontru ho Asosiasaun Estudante Timorense iha Xina (AETX) kuaze na’in-20 iha salaun enkontru otél Sofitel sidade Hangzhou Provinsia Zheuhiang- Xina, domingo (24/09/23).

“Imi estudu, labele lakon tempu, nune’e ikus mai imi remata eskola imi fila ba Timor-Leste iha imi nia futuru mak atu hadia rai ne’e. Imi halo servisu di’ak maka sei fó valor ba governu Xina atu kontinua fó nafatin oportunidade ba sira seluk bele mai bebeik eskola iha ne’e,” PM apela.

Tuir Xanana, hanesan estudante ba eskola iha ema nia rain, la’òs atu buka de’it hetan titulu masteradu no doploma, importante liu mak aprende buat di’ak, atu aplika iha Timor-Leste.

“Imi mai eskola la’òs atu mai hetan de’it diploma, maibé diploma ne’e so serve, se bainhira imi servisu ona, no servisu halo di’ak, nia rezultadu di’ak ba povu, serbi rai ho di’ak no iha esperitu nasionalizmu di’ak atu serbi rai ne’e. Ida ne’e maka sei fó valor ba imi nia aan, familia no nasaun nia presiza,” nia hateten.

Governu Timor-Leste sei kontinua koopera ho parseiru sira atu haree estudante sira iha universidade privadu iha Dili banhira eskola hetan valor di’ak sei rekomenda atu hetan bolsu estudu.

Alende ida ne’e, governu sei kontinua kapasita estudante medisina iha nasaun Xina, Kuba, Indonézia no rai seluk tan, bainhira remata eskola bele kontinua sira nia estudu dotoramentu no mestradu hodi prepara rekursu di’ak kontribui ba dezenvolvimentu Timor-Leste.

Iha fatin hanesan, Prezidente Asosiasaun Estudante Timorense iha Xina (AETX), Candle Monteiro, no Vice Prezidente, Goerge Almeida reprezenta estudante tomak hato’o agradese ba mensajen furak hosi Xefe Governu bele fó tempu hala’o enkontru hodi fó mutivasaun ba sira.

“Ami agradese tebes ba Avo Nana no membru governu sira bele fó oportunidade mai hasoru ami hodi hato’o mensajen furak. Ami sei halo esforsu hotu hodi estuda ho didi’ak,” dehan Candle Monteiro.

Estudante Timoroan ne’ebé hala’o estudu iha Xina hamutuk 120-liu, durante ne’e hala’o sira nia estudu iha área, medisina jerál, administrasaun, marketing, enginaria geologia, kimika, arkitektura sivil enginaria, administrasaun, planu urbanu, dezeñu grafiku, petroliu no geologia, no areia seluk tan.

Esutante ne’e hetan bolsu estudu hosi Governu Xina ne’ebé hala’o estudu masteradu iha universidade oin-oin iha Xina hanesan,Beijing, Hangzhou,Shanghai,Wuhan, Fuzhou, Beijing, Nanjing, Hunan no seluk tan.

Entretantu, Embaixador Timor-Leste ba Xina, Abrão Santos informa nia parte kontinua regista no tau matan ba estudante sira bainhira hasoru problema ruma iha sira nia estudu.

Embaixador agradese tebes, durante ne’e estudante sira hatudu didikasaun dixiplina hodi kumpre regras hotu ne’ebé Governu sira oferese ba sira ho bolsu estudu ne’ebé sira hetan bele uza oportunidade murak ne’e aprende siensia hotu- hotu hanesan mensajen ne’ebé hato’o ona hosi xefe governu. (Smnews)