PM Xanana ho Ministro Obras Publika Observa Progresu Konstrusaun Sira Iha Dili Laran

Smnewstl.com -Primeiru-Ministru (PM), Kay Rala Xanana Gusmão akompaña hosi Ministru Obras Públika (MOP), Samuel Marçal ho Sekretáriu Estadu Assuntu Toponímia no Organizasaun Urbana (SEATOU), Germano Santa Brites Dias hala’o observasaun durante loron tomak, hodi haree direta progressu hosi projetu konstrusaun ne’ebé implementa iha Díli laran, sábadu (11/04/24).

Antes hala’o observasaun, Xefe Governu orienta ekipa hodi hala’o uluk limpeza ne’ebé hetan apoiu ekipamentu pezadu bá hamoos sendimentasaun no foer iha valeta sira área Caicoli.

Limpeza ne’e atu evita inundasaun iha tempu udan iha área Caicoli, liuliu Tribunál Rekursu nia oin tun bá edifísiu Komandu Jerál Polísia Nasionál Timor Leste (PNTL), edifísiu Ministériu Justisa (MJ) nian, Kampus UNTL-Liceu, Estádiu Dili tún to’o Palásiu Governu nia oin.

Xefe Governu orienta ekipa MOP no SEATOU halo limpeza hodi halo mós indentifikasaun bá ponte kiik hirak ne’ebé ho medida kloot no tuir planu sei sobu hodi loke lu’an atu bee-dalan bele la’o livre sai bá tasi área Portu Dili no Palásiu Governu oin.

“Ita haree iha Caicoli nian bee dalan kloot. Fatin sira ne’ebé tahu no foer nakonu ne’e tenke kee sai hotu hodi bee la’o sai iha parte Caicoli, Komandu PNTL nian tun livre hodi evita inundasaun,” Xefe Governu orienta.

Primeiru-Ministru mós observa projetu konstrusaun estrada no reabilitasaun drainazen iha Díli laran, orienta Ministru Samuel Marçal atu fó-atensaun bá kompañia sira hodi aselara servisu tuir tarjetu no halo obra ho kualidade.

Projetu reabilitasaun bá drainazen iha Dili laran implementa hosi Kompañia Star King Unipessoal Lda ne’ebé responsabiliza projetu estrada no drainazen iha área Delta II no Delta IV, kompañia Fortuna kaer projetu estrada no drainazen iha Suku Manleuana, kompañia Montana Diak kaer projetu estrada no drainazen iha área Rai-Kotu to’o Rotunda Nicolau Lobato, Kompaña Dili United kaer projetu estrada no drainazen iha área Ai-mutin inklui estrada Delta I no kompañia Jonize Construction Unipessoal Lda, kaer projetu iha área Fomento bá Manleuana Uma Adat.

Primeiru Ministru observa mós ekipa tékniku MOP nian ne’ebé implementa hela servisu “Cool-Mix Aspalt” ka halo manutesaun bá estrada kuak iha Dili laran.

Iha meiudia, ekipa mós observa prossesu implementasaun projetu estrada iha àrea Aitarak-laran no haree mós servisu atu harii jardim iha Bidau Santa-Ana inklui área Bidau Sengol.

Iha parte lokraik, Primeiru Ministru Xanana Gusmão ho ekipa kontinua observa prossesu loke estrada iha área Kasnafar nian ne’ebé tuir planu sei hadi’a hodi fui aspalt bainhira Ponte Kasnafar finaliza iha tinan ne’e.

Iha tempu hanesan, ekipa haree direta progressu implementasaun projetu konstrusaun ponte Kasnafar no morru protesaun mota nian ne’ebé atinje ona 50%-resin. Ponte ne’e rasik hatuur fatuk dahuluk iha fulan Novembru 2023 no implementa hosi Kompaña Carya Timor-Leste ne’ebé tuir tarjetu sei finaliza iha tinan ne’e.

Ikus liu PM Xanana Gusmão hala’o vizita no haree direta progressu implementasaun projetu loke estrada hosi área Cristo Rei bá Dolok-oan ne’ebé implementa hosi kompañia Carya Timor-Leste ne’ebé atinje ona 60%.

Kompañia ne’e hahú harii no konstrui morru protesaun tasi nian inklui kee-sai fatuk hodi loke lu’an estrada parte Cristo Rei nian, ne’ebé tuir planu sei finaliza iha fulan Agostu tinan ne’e.

Observasaun ikus maka Xefe Governu ho ekipa haree progressu konstrusaun Jardim Cristo Rei ne’ebé implementa hosi kompañia Sabrika Unipessoal Lda. (SMnews)