Smnewstl.com—Primeiru-Ministru, Kay Rala Xanana Gusmão ho delegasaun to’o ona Singapura no simu hosi Ministru Relasaun Exteriór Singapura, Vivian Balakrishnan ho Embaixadór Timor-Leste (TL) bá Singapura, Alexandre Tilman.
Primeiru-Ministru ho delegasaun to’o Aeroportu Internasionál Changi, Singapura iha tuku 10:53 oras Singapura nian.
Hosi Aeroportu Internasionál Changi, Xefe Governu ho delegasaun diretamente bá fatin deskansa nian iha The Fullerton Hotel.
Durante minutu balun, Primeiru-Ministru hala’o kedan enkontru badak ho delegasaun hodi haree hamutuk kona-bá ajenda prinsipál sira bá vizita ofisiál iha Singapura.
Delegasaun ne’ebé akompaña Primeiru-Ministru maka membru seniór sira iha Gabinete, inklui Vise-Primeiru-Ministru, ne’ebé ezerse mós funsaun hanesan Ministru Koordenadór Assuntus Ekonómikus no Ministru Turizmu no Ambiente, Francisco Kalbuadi Lay; Ministru Negósiu Estranjeiru no Kooperasaun, Bendito dos Santos Freitas; Vise-Ministra bá Assuntu ASEAN, Milena Maria da Costa Rangel; no Sekretáriu Estadu Komunikasaun Sosiál, Expedito Dias Ximenes no Xefe Gabinete Primeiru-Ministru nian, Elizabeth Exposto.(*/Smnews)
Komentariu