PM Xanana Apresia Orsamentu Retifikativu Billaun $1.77 Pasa iha Finál Globál

Smnewstl.com – Primeiru-Ministru, Kay Rala Xanana Gusmão agradese ba maturidade politika hosi deputadu bankada parlamentar sira ne’ebé fó konfiansa iha votasaun finál global hodi aprova Orsamentu Retifikativu (OR) ho montante billaun $1,77.

Orsamentu Retifikativu 2023 ne’e, Parlamentu Nasionál aprova ho votu afavór 41, kontra 0, no abstensaun 23.

Proposta Lei ne’e inklui alterasaun dahuluk ba Lei n. 15/2022, loron 21 fulan-dezembru, kona-ba Orsamentu Jerál Estadu ba tinan 2023 no ba Lei n. 2/2022, loron 10 fulan-fevereiru, kona-ba Enkuadramentu Orsamentu Jerál Estadu no jestaun finanseira públika, no alterasaun daruak ba Lei n. 8/2008, loron 30 fulan-juñu, kona-ba Lei Tributária.

Orsamentu ne’ebé aprova ona iha despeza ho valór dolar amerikanu $ 439.060.944 ba asuntus ekonómikus, dolar amerikanu $24.965.254 ba abitasaun no infraestruturas koletivas, dolar amerikanu $ 94.411.189 ba saúde, dólar amerikanu $136.974.446 ba edukasaun no dólar amerikanu $ 253.389.284.

PM Xanana Gusmão liu hosi intervensaun iha sesaun aprezentasaun Orsamentu Retifikativu konsidera abienta deskusaun orsamentu durante loron tolu ne’e la’o di’ak tebes mezmu mosu dezentendimentu no ideia pro kontra, maibé deputadu hotu hanoin di’ak hakarak hadia no povu no nasaun nia problema.

Xefe Governu husu ba deputadu bankada parlamentar sira atu hamutuk ho sosiedade sivil kontinua halo fiskalizasaun makas ba programa no orsamentu ne’ebé goveru sei ezekuta durante loron 120.

“Ha’u agradese tebes, hodi IX Governu nia naran, ha’u halo apelu boot tebetebes ida. Fiskaliza ami, imi nia devér. La’ós de’it opozisaun, imi hotu tenke fiskaliza, para buat ne’e bele hala’o ho di’ak. Halo sala krítika, hahú hosi ita boot sira ne’e, ida ne’e duni mak ita bele haforsa no haboot ita nia demokrasia atu hadia ita nia rain,” dehan PM Xanana iha Parlamentu Nasionál.

Iha fatin hanesan, Primeira vise Prezidente Parlamentu Nasionál, Maria Terezeinha Viégas hato’o agradese ba PM Xanana ho membru governu hotu hodi partisipa ona iha deskusaun to’o remata.

“Obrigadu señor Primeiru Ministru, ami tenke fiskaliza duni, kna’ar ida ne’e mak parlamentu nia kna’ar no mós, fó parabéns, votus de bom traballu, no susesu sira bá Nonu-Governu, no mós ba ita Deputadu na’in-65 ne’ebé fó atensaun seriu ba debate orsamentu ne’e ho karakter urjente,” nia agradese.

Tuir planu, Parlamentu Nasionál liu hosi komiaun C Trasa Asuntu Finansas no Públikas sei halo redusaun finál, molok entrega ba Prezidente Repúblika sei hare e durante semana ida, antes promulga.(Smnews)