PM Taur la ‘Preokupa’, Francisco Jeronimo Kontinua Lidera MAPKOMS

Smnewstl.com 13-11-2021 (Dili) – Ministru Assuntu Parlamentar no Komunikasaun Sosiál (MAPKOMS), Francisco Jerónimo afirma, Primeiru-Ministru (PM), Taur Matan Ruak mak lakohi atu suspende nia husi kargu hanesan Ministru ligado ho kazu diskumfia subar Amante (selingkuh) ne’ebe sai viral iha media social facebook no konsumu publiku hafoin media balun deskobre.

Executivo ne’e rekuinese provisoriamente nia parte suspende a’an ona husi Membro Comite Central FRETILIN, enkuanto pozisaun hanesan membro governo nafatin hetan fiar husi Primeiro Ministro, Taur Matan Ruak.

“Ha’u bá ko’alia ho Primeiru-Ministru, Primeiru-Ministru mak lakohi suspende ha’u, la’ós ha’u-nia kompeténsia, iha governu la’ós ha’u-nia kompeténsia, Primeiru-Ministru mak iha kompeténsia, sé Primeiru-Ministru la suspende ha’u, ha’u atu dehan tan saida,” afirma atual Presidente Federasaun Futebol Timor Leste ne’e hafoin ensera Kongresu Extraordinario TLPU iha Salao Delta Nova, Sabado, (13-11-2021).

Francisco Jeronimo kontinua defende katak, informasaun ne’ebé sai konsumu públiku ne’ebé diskonfia, nia subar amante iha FFTL ne’e laloos, tanba realidade situasuan ne’e la akontese.

Nia afirma, sei prosesu bá ema hirak ne’ebé kontinua ofende nia ho informasaun ne’ebé laloos bá tribunál nune’e bele hatur lialoos.

“Ha’u halo tihla ona Press Conference, ha’u dehan tiha ona katak, buat sira-ne’e la akontese buat sira-ne’e falsu, maibé prontu, hotu-hotu hakarak kontinua buka sala, ikus liu ita bá tribunál. Sé mak ofende ha’u, sé mak halo sasán ne’ebé laloos buka mak ódiu no vinga malu, di’ak liu ikus iha ne’ebá, atu nune’e, bele fó solusaun bá problema hotu,” tenik nia.

Prezidente FFTL ne’e admite tan katak, nia mós iha direitu atu hela iha FFTL, tanba Prezidente sesan Francisco Kalbuadi Lay mós momentu ne’ebá hela hotu iha FFTL.

“La presiza tau tan kestaun tanba saida.? Sé uluk Prezidente anteriór bele uza ha’u labele uza tan saida.? Uluk liu Prezidente anteriór señór Kalbuadi bele toba iha ne’ebá, ha’u toba iha ne’ebá labele tanba saida.? Pergunta mak ne’e. Ita hakarak sasán tenki iha realidade no faktus mak ita ko’alia, labele ódiu malu de’it, ita hakarak hakerek ódiu vingansa ne’e la di’ak ida, ita ódiu malu la hotu,” hakotu nia.(ant)