PM Taur Ezonera Ona Jenerál Lere, Falur Sa’e Bá Tenente Jenerál

Smnewstl.com 21-01-2022 (Dili) — Governu liu husi reuniaun Konsellu Ministru (KM) ne’ebé lidera husi Primeiru-Ministru (PM), Taur Matan Ruak aprova ona proposta ezonerasaun Xefe Estadu Maiór Jenerál FALINTIL Forsa Defeza Timor-Leste (F-FDTL), Tenente Jenerál Lere Anan Timur nian.

Proposta ne’e hetan ona aprovasaun iha reuniaun Konsellu Ministru, ne’ebé aprezenta husi Primeiru-Ministru (PM), Taur Matan Ruak no Ministru Defeza, Filomeno Paixão.

Alem de ne’e, Konsellu Ministru mós aprova proposta nomeasaun bá atuál Vise Xefe Estadu Maiór Jenerál F-FDTL, Major Jenerál Falur Rate Laek bá fali Xefe Estadu Maiór Jenerál F-FDTL, hodi troka Tenente Jenerál Lere Anan Timur.

Enkuantu, Brigadeiru Jenerál Calisto dos Santos ‘Coliati’, promove bá Major Jenerál F-FDTL hodi troka Falur Rate Laek no Pedro Klamar Fuik bá Brigadeiru Jenerál.

Ministru Prezidénsia Konsellu Ministru, Fidélis Magalhães hateten, proposta ne’e hetan ona aprovasaun husi konsellu ministru, tanba ne’e, sei haruka bá Prezidente Repúblika (PR), Francisco Guterres Lú-olo hanesan Komandante Supremu Forsas Armandas nian.

“Konsellu Ministru aprova proposta bá ezonerasaun bá Jenerál Lere hanesan Xefe Estadu Maiór Jenerál Forsas Armandas nian, no konsellu ministru aprova substituisaun bá Jenerál Lere aprova señór Jenerál Falur Rate Laek bá fali Xefe Estadu Maiór Jenerál Forsas Armandas, no mós aprova proposta Vise CEM bá atuál Brigadeiru Coliati,” dehan Ministru Fidélis Magalhães, iha Palásiu Governu, Sesta-feira ne’e.

Hafoin aprova tiha proposta ezonerasaun no nomeasaun bá XEMJFA, no Vise XEMJFA, governu mós re-intera fila-fali proposta nomeasaun Komodoru Donaciano Costa Gomes, Pedro Klamar Fuik bá Brigadeiru Jenerál, ne’ebé antes ne’e haruka ona bá Prezidente Repúblika.

“Konsellu ministru mós re-intera fila-fali Xefe Estadu Maiór (CEM) ne’ebé konsellu ministru semana hirak liu bá haruka tiha ona bá PR, konkorda ho promosoens bá Jenerál hirak ne’ebé mak sei asume kargu hanesan Xefe Estadu Maiór Jenerál Forsas Armandas nian, no mós hirak ne’ebé mak sei asume kargu hanesan Vise Xefe Estadu Maiór Jenerál Forsas Armandas nian,” esplika Fidélis.

Fidélis Magalhães hatutan, hafoin aprova, governu sei haruka kedas bá Prezidente Repúblika, Francisco Guterres Lú-olo. Nune’e, Xefe Estadu sei konvoka enkontru konsellu estadu no konsellu superior defeza no seguransa, molok foti desizaun.

“Tuir dalan, konsellu militár nian halo sira-nia reuniaun, depois fó proposta sira mai liu husi Ministru Defeza, bainhira Ministru Defeza haruka mai iha konsellu ministru la’ós mesak, maibé sei halo mós ho Primeiru-Ministru, to’o iha konsellu ministru halo desizaun hafoin desizaun ikus haruka bá Prezidente Repúblika, antes PR halo desizaun sira tenki-ser konvoka konsellu superior defeza seguransa nian antes to’o desizaun finál,” dehan nia.

Entretantu, Xefe Estadu Maiór Jenerál F-FDTL, Tenente Jenerál Lere Anan Timur hato’o karta reforma bá Ministru Defeza, Filomeno Paixão, iha loron 11 fulan Janeiru 2022, tanba hakarak fila ona vida sivíl.

Antes ne’e mós Tenente Jenerál Lere Anan Timur afirma, bainhira governu no Prezidente Repúblika aseita pedidu reforma ne’e, maka nia sei fila bá vida sivíl no sei Kandidata aan bá Prezidente Repúblika iha eleisaun prezidensiál tinan ida-ne’e.(ant)