PM Taur Ezonera Ona Faustina Saldanha Husi Polisia

Smnewstl.com 19-10-2021 (Dili) – Komandante Jeral Polisia Nacional Timor Leste, Komisario Faustino da Costa deklara ba publiku katak, sidadaun Faustina Saldanha Cardoso ne’ebe Tribunal aplika pena tinan 4 komarka laos ona hanesan membru PNTL.

Komisario Faustino justifika, antes ne’e Faustina Saldanha Cardoso hanesan mós membru PNTL, maibé tanba komete iha kazu krime falsifikasaun dokumentu ho burla agravadu nune’e liu husi desizaun Konsellu Superior PNTL deside hato’o despaixu demisaun bá Primeiru-Ministru no Ministru Interior, Taur Matan Ruak ezonera.

“Loos duni ema ne’e uluk membru PNTL, maibé antes PSIK ezekuta mandadu Konsellu Superior PNTL reuni tiha ona no aprezenta bá governu proposta demisaun, ne’ebé Sua Exelénsia Primeiru-Ministru hanesan mós Ministru Interior hasai ona despaixu demisaun.

Dala ida tan hau dehan, nia hanesan sidadaun no eis membru PNTL,” informa Faustino iha Komandu Jerál Kaikoli Dili, Tersa ne’e.

Nia hatutan, demisaun ba Faustina sai ona iha fulan tolu liu ba. “Iha tinan ida-ne’e duni 2021, ha’u la lembra klaru mais desizaun sai tia ona kuaze fulan tolu liu bá, nune’e nia hanesan ona ema sivil,”Faustino Fundamenta.

“PSIK kaptura Faustina tanba, ezekuta mandadu hosi Tribunál no desizaun interrogatóriu iha loron, (18-10-2021), rezultadu definitivu hetan pena prizaun tinan haat  ba krime burla agravadu ho falsifikasaun dokumentu,” informa Portavós PSIK, Octávio da Costa Araújo ba jornalista iha edifisiu PSIK Kaikoli, Segunda (18-10-2021).

Kronolójia ne’ebe SMNews asesu komfirma, Faustina komete krime burla agravadu ho falsifikasaun dokumentu  iha tinan 2019, no tuir ona primeiru julgamentu interogatóriu iha Tribunál Distritál Dili.

Rezultadu hosi prosesu ne’e, deside aplika pena prizaun preventiva durante fulan neen iha Prizaun Becora hodi hein kontinuasaun ba prosesu.

Bainhira Tribunal notifika fali hodi tuir kontinuasaun julgamentu, maibe Faustina la kumprimenta notifikasaun, nune’e, iha loron rua antes halo detensaun, Tribunal emite mandadu kapturasaun ba PSIK atu buka tuir hodi bele responsabiliza.

Bazeia ba mandadu hosi Tribunál, iha Sesta-feira, 15-10-2021, PSIK ezekuta órden Tribunal no detein Faustina iha sela PSIK durante oras 72 tuir lei.

Kumpre tiha oras 72, iha Segunda 18 Outubru 2021 dadeer, membru PSIK transporta kedan Faustina Saldanha ba tuir julgamentu iha Tribunál Distritál Dili hodi rona desizaun finál, no ikus deside aplika pena prizaun tinan haat.

Hafoin desizaun ne’e, PSIK transporta kedas Faustina ba iha Prizaun Gleno, Municipio Ermera.

Kazu ne’e rasik akontese iha tinan 2019, no PSIK rasik mak halo atendimentu ba prosesu ne’e to’o konkluzaun. (Ant)