PM Taur-Dom Virgílio Inaugura Igreja Sakrojes Becora, Agradese Governasaun Xanana

Smnewstl.com 21-11-2021 (Dili) – Primeiru-Ministru (PM), Taur Matan Ruak ho Archebispu Arkidioseze Metropolitanu Dili, Dom Virgílio do Carmo da Silva SDB, Domingo ne’e inaugura ona igreja Sagrada Korasaun de Jesus (Sakrojes) parókia Becora, Dili.

Planu no Konstrusaun ba Igreza ne’e mai kedas husi Governasaun Kay Rala Xanana Gusmao, ne’ebe nia servisu finaliza ona no hela deit retensaun 10% foin remata nune’e ohin Domingo, (21-11-2021) bele inagura.

Hafoin inaugura, kontinua kedas ho misa agradesimentu ne’ebé prezide husi Bispu Dioseze Dili, Dom Virgílio do Carmo da Silva, ho na’i lulik sira seluk.

Iha omília, Dom Virgílio do Carmo da Silva SDB konsidera inaugurasaun bá Igreja Sagrada Korasaun Jesus koinsidénsia ho festa kristu liurai taka tinan liturjia 2021, nune’e hahú ho kalendáriu liturjia foun no adventu.

“Ita inaugura Igreja Parokiál iha loron ida-ne’ebé Santa Kreda selebra solenidade festa kristu liurai nian, hakarak atu dehan saida mak ita, saida loos mak ita hakarak atu sosa, no sai saida loos mak ita hakarak hein husi selebrasaun ida-ne’e,” haktuir Dom Virgílio do Carmo da Silva.

Arkidioseze Dili hatutan, durante prosesu rekonstrusaun bá Igreja ne’e, sarani sira obrigadu hamrik de’it iha li’ur ho rai manas durante tempu naruk, maibé, la hamate sira-nia espíritu nu’udar ema katóliku atu partisipa iha missa.

“Tempu foun momentu grasa nian, loke Igreja foun loke kedas bá iha tempu no tempu grasa nian ne’ebé uma kreda hatur, ida-ne’e mak ha’u dehan, loos duni sarani Becora sira sente kontente no ksolok tanba rajaun ida-ne’e, duni, ita-boot sira iha li’ur ne’e rai manas, rai rahun ne’e kalma de’it, hahú semana oin ne’e imi-nian ona,” dehan Dom Virgílio.

Nune’e mós, Padre Parókia Sagrada Korasaun Jesus, Padre Domingos da Silva Maubere hateten, Parókia Becora hamutuk ho sarani sira sente kontente, tanba simu grasa boot husi Maromak.

“Grasa boot ne’ebé ami simu mak Igreja ida-ne’e, Igreja ida-ne’e ita ami hasoru maromak Padre, Maromak fillu, Maromak espíritu Santu atu ita atu dehan, na’i di’ak liu ita hela ona iha ne’e,” dehan Padre Domingos Maubere.

Iha biban ne’e, Padre Domingos Maubere mos agradese ba entidades hotu hahu kedas husi governasaun Kay Rala Xanana Gusmao kontinua kedas ho Rui Maria de Araujo mai to’o governasaun atual nune’e ohin srani sira bele hetan fatin ida diak hodi hametin sira nia fiar.

Sorin seluk, Primeiru-Ministru (PM), Taur Matan Ruak hateten, parseria entre estadu ho Igreja hahú kedas iha tempu naruk bá kotuk, la’ós de’it iha tempu luta bá ukun rasik aan, maibé, depois de restaurasaun independénsia.

Tanba, liu husi parseria ne’e, fó dalan bá estadu ho governu interven diretamente iha atividade rua. Liu-liu iha área infrastrutura no ida seluk iha setór sosiál.

“Iha tinan ida-ne’e, ita hakotu faze ida ne’ebé governu interven diretamente, ita hakotu hodi aplika espíritu konkordata ne’ebé asina ona ho Igreja, ne’e katak, governu la interven diretamente, mais interven atraves de Igreja, no governu ninia partisipasaun hela de’it iha apoiu finanseiru ne’ebé kada tinan tuir konkordata governu fó tuir rekursu ne’ebé nasaun iha,” dehan PM Taur.

Xefe Governu ne’e sente kontente ho apresia, tanba, maske prosesu rekonstrusaun bá Igreja ne’e la’o durante tempu naruk, maibé, finalmemte konklui duni ho kualidade ne’ebé di’ak tebes.

Entretantu, projetu rekonstrusaun bá Igreja Sagra Korasaun Jesus ne’e, inísiu diskusaun iha tinan 2013 ne’ebé lidera husi Bispu Dioseze Dili, Saudozu Dom Alberto Ricardo da Silva, no Amu Párku Sesan, Padre Guilhermino da Silva.

Nune’e, konsege hatama proposta ho dezeñu bá governu liu husi Gabinete Apoiu Sosiedade Sivíl ho Ajénsia Dezenvolvimentu Nasionál (ADN).

Projetu rekonstrusaun igreja Sakrojes ne’e, responsabiliza husi kompañia BTK ne’ebé kompletu ho ekipamentu mobiliáriu.

Nune’e mós, husi parte Igreja Parokiál Becora, aprezenta planu foun bá ADN ho kustu $ 2.110,381.05, hafoin ADN halo tiha verifikasaun, ADN aprova planu segundu ho montante $ 2,68,587.24 sentavus.

“Husi montante ida-ne’e, Arkidioseze Metropolitana Dili kontribui 30%, estadu Timor-Leste liu husi governu kontribui 79%. No kuantifika bá osan, Arkidioseze Dili tau osan hamutuk $ 300 mill dolares, no governu tau osan hamutuk $ 1.768,587.24 sentavus.

Maibé, husi Parókia Becora mós liu husi ema laran di’ak sira balun kontribui hodi selu kustu dezeñu kustu tomak servisu adisionál nian, kursu bá dezeñu hamutuk $ 65 mill, no kustu adisionál iha $ 117,452. 45 sentavus. Ne’eduni totál kontribuisaun hamutuk $ 182,432.45 sentavus.

Nune’e, iha loron 21 fulan Juñu tinan 2915 hamutuk ho maktoban Dom Basílio do Nascimento nu’udar Administradór Apostóliku Dioseze Dili nian iha momentu ne’ebá, ami hahú halo serimónia tau dahuluk bá konstrusaun igreja foun, no iha loron 30 fulan Novembru tinan 2015, hahú sobu igreja tuan.

Servisu rekonstrusaun hala’o durante tinan 4 nia laran, no Parokianu Becora hein durante tinan 5 ho balun.

Partisipa iha inaugurasaun Igreja Sakrojes ne’e, Xefe Governu, Taur Matan Ruak ho Espoza, Vise Prezidente Parlamentu Nasionál (PPN), Maria Angelina Sarmento ho Espouzu, membru PN, eis titulár, líder komunitáriu, sarani Parókia Becora no seluk tan.(ant)