PM Taur Aujensia, KM Liderado Armanda Berta Adi’a Diskusaun Proposta Reforma Jenerál Lere

Smnewstl.com 19-01-2022 (Dili) — Reuniaun Konsellu Ministru seidauk diskuti no aprova proposta reforma ne’ebé aprezenta husi Xefe Estadu Maiór Jenerál FALINTIL Forsa Defeza Timor-Leste (F-FDTL), Tenente Jenerál Lere Anan Timur nian.

Tuir informasaun ne’ebe Smnewstl asesu Kuarta-feira, (19/01/22) asesu komfirma, konsellu ministru ajenda ona diskusaun bá Deliberação: Nomeação do Chefe de Estado-Maior General das Forças Armadas (CEMGFA), do Vice-Chefe de Estado-Maior General das Forças Armadas (V-CEMGFA) e do Chefe do Estado-Maior das Forças Armadas (CEMFA) (MD).

Maibé, tanba Primeiru-Ministru (PM), Taur Matan Ruak auzénsia iha reuniaun konsellu hafoin fila husi diálogu komunitária iha rejiaun Oe-cusse nune’e la konsege diskuti.

Enkuantu reuniaun konsellu ministru ohin lidera husi Vise PM, Armanda Berta dos Santos, ho hetan partisipasaun husi membru governu sira.

Ministru Defeza, Filomeno Paixão de Jesus konfirma, proposta reforma ne’ebé Tenente Jenerál Lere Anan Timur nian, iha ona Prezidénsia Konsellu Ministru, tanba ne’e adi’a bá reuniaun extra-ordináriu konsellu ministru iha Sesta-feira (20/01/22) mak atu diskuti no aprova.

“Ohin seidauk deside iha konsellu ministru hein deside hotu mak sei fó sai, submete ona ohin adi’a fali bá iha sesta lokraik tuku 4, proposta bá par señór Primeiru-Ministru ami iha fali reuniaun extra-ordináriu konsellu ministru,” informa Ministru Defeza, Filomeno Paixão, bá jornalista iha Palásiu Governu, kuarta ohin.

Paixão hatutan, proposta reforma Tenente Jenerál Lere Anan Timur nian, nia simu iha loron 11 Janeiru foin lalais ne’e, maske nia rasik sei la férias.

Tanba ne’e, proposta reforma ne’e, sei adi’a bá reuniaun extra-ordináriu konsellu ministru ne’ebé sei lidera husi Primeiru-Ministru, Taur Matan Ruak Ruak rasik.

“Sim señór Primeiru-Ministru iha ne’ebá, mais ne’e mak ohin ha’u dehan ne’e, konsellu ministru sei halo fali lokraik i ami sei hein la’o desizsun husi señór Primeiru-Ministru hatán ga la’e, ne’ebé assuntu ida-ne’e seidauk ko’alia ida, atu ko’alia kona-ba karta reforma,” dehan nia.

Entretantu, antes ne’e, Xefe Estadu Maiór Jenerál F-FDTL, Tenente Jenerál Lere Anan Timur deklara ona katak, nia hatama ona karta reforma bá Ministru Defeza, Filomeno Paixão, nune’e bele aprezenta bá iha reuniaun Konsellu Ministru.

Tenente Jenerál Lere Anan Timur mós dehan, bainhira laiha impedimentu polítika ruma bá nia pedidu ne’e, maka nia sei sai bá vida sivíl no mós sei kompete bá iha Kandidatu Prezidente Repúblika periódu 2022-2027.(ant)