PM Solisita PR Atu Fó Posse Ba Susessór Vise MF, Helder Lopes

Smnewstl.com- Primeiru Ministru Kay Rala Xanana Gusmão solisita ona ba Prezidente Repúblika, José Ramos-Horta atu nomeia Felícia Claudinha Cruz Carvalho ba Vise Ministra Finansa, hodi troka Helder Lopes ne’ebé exoneradu iha semana kotuk.

Proposta ne’e, ho konsiderasaun ba Helder Lopes nia exonerasaun, liu-hosi dekretu Prezidente numeru 86/2023, 8 Setembru no Konstitusuan RDTL artigo 106.

Karta ho nú. 095/PM-GPM/IX/2023 emitidu iha loron 11 fulan Setembru tinan 2023 ho assuntu proposta nomeasaun ba Vise Ministra Finansa, tama ona iha Gabinete Prezidénsia Repúblika no simu iha 14h46.

To’o notisia ne’e fo sai, seidauk iha markasaun data husi Prezidénsia Repúblika ba tomada de posse Felícia Claudinha Cruz Carvalho nu’udar Vise Ministra Finansas.

Tuir informasaun, Helder Lopes sei nomeado iha tempu besik, sai Governadór Banku Sentrál Timor-Leste – BCTL, hodi troka Abraão de Vazconselhos.
Helder Lopes rasik posse husi Presidente Republika, José Ramos-Horta iha loron 1 Junho 2023 nudar Vice Ministro Finanças iha Governasaun Dasia Liderado husi Kay Rala Xanana Gusmão.(Smnews)