Planu Investimentu Hotel Estrelas ho Andar 25 Iha Kaikoli Sei Nakfilak Fali ba Edifisio PN

Smnewstl.com 03-12-2021 (Dili) – Sekretáriu Estadu Terras Propriedades (SETP), oferese fali rai iha eis finansas tempu Indonézia iha Kaikoli Dili ba Parlamentu Nasionál (PN) hodi harii sira-nia edifísiu foun maske antes ne’e halo ona lansamentu husi governo anterior ho kompanha Internacional balun kona ba investimentu Hotel Estrela ho andar 25, ne’ebe to’o oras ne’e laiha novidades.

Sekretáriu Estadu SETP, Mário Ximenes hateten, iha tinan 2005 ho tinan 2006, SETP destina ona rai iha área Tasi-Tolu atu harii edifísiu PN, maibé la konsege. Nune’e, SETP deside fali rai iha área heliport Palásiu Prezidensiál nia kotuk kuaze ektares 4, maibé kestaun seguransa labele harii edifísiu órgaun estadu rua besik malu.

Nia hatutan, bazeia ba ida ne’e maka PN hasai fali rezolusaun n.°21/2021 hodi husu atu harii fali edifísiu PN besik iha edifísiu Ministériu Justisa nia oin. Maibé, SETP la autoriza, tanba rua ne’e entrega ona bá Polísia Sientífika Investigasaun Kriminál (PSIK), Prokuradoria Jerál Repúblika (PJR).

Ne’eduni, bainhira harii edifísiu foun PN mak sei prejudika mós servisu Batallaun Orden Públika (BOP), Estatístika, Bee Timor-Leste, Ambulánsia Nasionál no Obras Públikas.

“Agora sira-ne’e mak ita tenki hasai, ita hapara atividade lubuk ida, atividade sira-ne’e mak direta fó atendimentu bá ita-nia komunidade sira, liu-liu ambulánsia, estatístika água no saneamentu, eletrisidade, ho rajaun sira-ne’e mak ita seidauk deside atu fó ga la fó, ita só fó ideia rajoens téknika sira-ne’e par atu bele hola konsiderasaun,” dehan Sekretáriu Estadu SETP, Mário Ximenes iha Plenária PN, Sesta-feira ne’e.

Governante ne’e afirma, hafoin tetu hotu rísku sira, SETP oferese fali rai ektare 3 iha eis finansas tempu Indonézia iha Kaikoli bá PN hodi harii edifísiu foun, bainhira sira hakarak.

“Ita sei iha meius ida tan, dala ida depende husi PN mak bele hili no tetu bá iha eis finansas tempu Indonézia nian Kaikoli husi estrada kraik to’o estrada leten ne’e mamuk, fatin oituan ne’e purvolta de 3 ektares,” dehan Mário.

Nia hatutan, bainhira PN aseita ona fatin eis finansas Kaikoli ne’e, maka SETP prontu atu fó apoiu téknika atu identifika no sukat foun fali.

“Sorin mai ligasaun ho PNTL, komunidade rua mak hela, sé ida-ne’e mak Prezidente PN disponível ho fatin ida-ne’e, governu liu husi Ministériu Justisa téknikamente Terras Propriedades prontu fó apoiu atu identifika no sukat foun fila-fali hodi bele konsede bá PN atu konstroe edifísiu PN bá futuru,” subliña nia.

Maski ne’e, nia esplika tan katak, atu halo libertasaun bá rai ida la’ós fásil, kuantu mais iha sidadaun barak inklui instituisaun estadu balun mós okupa hela rai ne’e.

Entretantu, dadaun ne’e fatin refere utiliza hela husi timoroan sira hodi halo negosio fa’an motor, kareta inklui espasu balun ba fase kareta.(ant)