Pe Júlio Crispin: Armanda Berta Rezigna A’an Kuando Ofisiliaza Ona Nia Kandidatura Iha TR

Smnewstl.com — Jurista Timoroan, Padre Júlio Crispim afirma, ofisialmente Prezidente Partidu KHUNTO, Armanda Berta dos Santos deklara ona nia kandidatura bá Prezidente Repúblika tinan 2022-2027 bá públiku, maibé seidauk sai kandidatu ofisiál.

Tuir Júlio katak, Prezide nte Repúblika (PR), Francisco Guterres Lú-olo seidauk dekreta kalendáriu bá eleisaun prezidensiál, no mós Armanda Berta seidauk bá rejista ninia kandidatura iha tribunál rekursu.

Jurista esplika, atu ofisializa Armanda Berta dos Santos nia kandidatura, tenki rejista iha tribunál rekursu tuir lei eleisaun prezidensiál nian.

“Agora ita seidauk bele ko’alia tanba, nia publika kandidata-aan, maibé seidauk sai kandidatu ofisiál, kandidatu ofisiál ne’e hahú ho ninia inskrisaun bá tribunál rekursu katak, nia prontu ona atu kandidata tuir dekretu Prezidente ne’ebé fó ona data eleisaun, iha kalendáriu bá eleisaun nian,” dehan Pe Júlio Crispim, Tersa (20/07/21) iha nia rezisténsia Bebonuk, Dili.

Jurista ne’e esplika, bainhira Armanda Berta rejista ona ninia kandidatura iha tribunál rekursu, nia tenki rejiga-aan ona husi kargu hanesan Vise Primeira-Ministra no MSSI, nune’e labele fó implikasaun bá servisu estadu nian.

“Agora dadauk, ofisialmente nia kandidata-aan mais seidauk sai kandidatu ofisiál, tanba ne’e kuandu nia sai kandidatu ofisiál ona, nia presiza rejiga-aan para labele iha implikasaun bá rekursu estadu nian bá ninia kandidatura,” afirma nia.

Moralmente Pe Júlio afirma, molok deklara ofisiál bá públiku kona-ba ninia kandidatura, Armanda Berta tenki fó koñesimentu ofisiál bá Primeiru-Ministru, Taur Matan Ruak.

Alem de PM Taur, Armanda Berta mós tenki fó koñesimentu bá lideransa plataforma entedimentu partidu FRETILIN, PLP no KHUNTO ne’ebé forma governu VIII Governu konstitusionál.

“Sé la konsulta mós tenki fó koñesimentu ofisiál bá Primeiru-Ministru molok deklara ninia aan sai Prezidente, ne’e problema respeitu no morál bá ita-nia superiór ierarkiku ita órgaun soberania do estadu. Segundu fó koñesimentu bá koligasaun governu nian katak, nia atu deklara nia kandidatura ga la’e,” esplika nia.

Armanda Berta dos Santos deklara bá militante iha ámbitu inaugurasaun sede nasionál KHUNTO foin lalais ne’e, kona-ba nia kandidatu bá eleisaun prezidensiál.

Mosu polémika iha públiku iha media sosiál, tanba konsidera atuál Vise Primeira-Ministra no Ministra Solidariedade Sosiál no Inkluzaun (MSSI), Armanda Berta, viola lei, tanba sei asume hela funsaun nu’udar membru governu, maibé deklara ona katak, nia sei kandidata-aan iha eleisaun prezidensiál tinan 2022-2027.

Nune’e mós sosiedade sivil liu husi FONGTIL lamenta ho deklarasaun ofisiál Prezidente partidu KHUNTO ne’e, tanba bele uza fali rekursu estadu nian bá kampaña eleisaun prezidensiál.(ant)