PD Soe Manu Aman 2 Kompete ba Eleiesaun Preszidensial, 15 Janeiro Realiza Konvesaun Nacional

Smnewstl.com 10-01-2022 (Dili) – Partido Democratico ofisialmente anunsia ba publiku Segunda-feira ne’e kandidatura rua kompostu Mariano Asanami Sabino ho Prezidente Komisaun Polítika Naisonál (KPN), Adriano do Nascimento hodi kompete iha konvensaun nasionál, iha loron, 15 Janeiro 2022, hodi bele avansa ba iha kandidatura Presidente Republika periodo 2022-2027.

Liu husi komferénsia imprensa, Sekretáriu Jerál PD, António da Conceição deklara, PD prepara ona nia kandidatu atu konkore iha eleisaun prezidensiál, tanba PD hakarak haburas no hametin demokrasia iha Timor-Leste.

“PD liu husi órgaun konsellu superiór iha loron 6 no loron 7 fulan Janeiru simu disponibilidade kandidatu na’in-rua ne’ebé prontu ona atu kompete malu iha iha partidu liu husi konvensaun nasionál ne’ebé sei realiza iha dia 15 Janeiru hodi sai nu’udar kandidatu nasionál,” dehan Sekretáriu Jerál PD, António da Conceição, iha sede PD kolmera, Dili, segunda ne’e.

Mariano Asanami Sabino ho Adriano dos Nascimento hafoin konfrensia imprensa iha Sede PD Kolmera Dili, Segunda-feira, 10-01-2022. Foto Lusa Antonio Sampaio 

Kalohan esplika, liu husi konvensaun nasionál, kandidatu na’in-rua ne’e sei debate hodi aprezenta sira-nia vizaun nu’udar Prezidente Repúblika bá militantes no partisipante sira iha konvensaun nasionál, nune’e bele hili kandidatu independente ida nu’udar kandidatu nasionál bá atu kompete mós iha eleisaun prezidensiál.

Kandidatu Mariano Assanami Sabino deklara, PD nia kandidatura ne’e nu’udar responsabilidade, tanba PD mós nu’udar partidu tuan liu depois de partidu FRETILIN, tanba partidu rua ne’e maka asina konstituisaun RDTL.

“Entaun ne’e la’ós hakarak ou la hakarak, maibé iha deveres ne’ebé kesi PD katak, tenki prontu bá estadu, labele la’e bá Estadu. Ne’ebé PD nia kandidatura sei sai kandidatura povu nian,” afirma Assanami.

Nune’e mós, Kandidatu Adriano do Nascimento afirma, PD mosu ho kandidatu na’in-rua, tanba hakarak dinamiza prosesu demokrasia iha nasaun no partidu laran.

“Tanba sá mak PD mosu ho kandidatu rua. Ami-nia partidu naran PD, tanba ne’e mak líder PD tenki dinamiza demokrasia iha nasaun ida-ne’e, no mós dinamiza iha ami-nia partidu rasik. Ami mai ho prinsípiu prontu atu serví, maibé tenki ta’es liu husi mekanízmu demokrátiku, atu nune’e demokratizasuan ne’e bele la’o,” dehan Adriano.

Nune’e, iha loron 4 fevereiru, PD sei lori kandidatu ne’ebé hetan fi’ar liu husi konvensaun nasionál ne’e bá rejista iha Tribunál Rekursu kona-ba sira-nia kandidatura nasionál PD nian bá eleisaun prezidensiál.