Patrimóniu Estadu Loke Ona Konkursu Públiku Bá Leilaun Viatura Estadu Rihun 1.015

Smnewstl.com 05-10-2021 (Dili) – Komesa horseik (segunda, 04-10-21) Ministériu Finansas liu husi Diresaun Jerál Jestaun Patrimóniu Estadu (DJJPE) loke ona konkursu públiku atu halo leilaun bá viatura estadu hamutuk rihun 1.015 ne’ebé sei taka iha loron 18 fulan outubru tinan 2021.

Diretór Jerál Jestaun Patrimóniu Estadu, Januário da Gama informa, husi rezoltadu flit survey ne’ebé DJJPE halo identifika viaturas iha territóriu laran tomak hamutuk unidades rihun 3.415, husi númeru refere la inklui ekipamentu pezadus sira.

Husi kareta 3.415 unidades ne’e kareta ho kondisaun di’ak hamutuk 3.013 unidades, kondisaun aat hamutuk 402 unidades, no total kareta ne’ebé prienxe ona kondisoens atu halo leilaun hamutuk 2.522 unidades.

Januário da Gama hatutan, husi viaturas unidades rihun 3.415 ne’e, iha rihun 1.015 unidades, motorizada hamutuk rihun 457 unidades, mak sei submete bá leilaun bá dala-14 iha tinan 2021, ne’ebé rekolla husi ministériu relevante no mós instituisaun estadu sira seluk ho modalidade konkursu públiku no konkursu internu.

“Porvolta de 1.015 unidades mak sei submete bá leilaun, husi 3.415, entaun 1.15 unidades ne’e nestemomentu iha implementasaun bá dala-14 iha tinan 2021, ministériu finansas liu husi diresaun jerál jestaun patrimóniu estadu sei halo leilaun 291 unidades, no motorizada hamutuk 457 unidades. Ida-ne’e agora abertura bá publikasaun avizu bá leilaun ne’e, agora dadauk la’o hela, komesa horseik ami ona sei taka iha dia 18 de outubru ida-ne’e,” informa Diretór Jerál, Januário da Gama, iha nia knar fatin Balide, Dili. Tersa ohin.

Eis Diretór jerál finansas estadu ne’e esplika, husi kareta rihun 1.15 ne’e, iha kareta 291 unidades, sei halo leilaun ho modalidade konkursu públiku no kareta hamutuk 159 unidades, no mós motorizada hamutuk 277 unidades.

Enkuantu, halo mós konkursu interna bá kareta hamutuk 132 unidades, no motorizada hamutuk 325 unidades, husi liña ministériu no mós insitituisaun estadu sira.

“Konkursu interna sei aplika bá ministériu solidariedade sosiál, bá MPCM, MAE, SEJD, Ministériu Saúde, Ministériu Justisa, Ministériu Petróleu Minerais, Tribunál Rekursu, UNTL, MOP SENAI no konsellu imprensa nian,” tenik nia.

Nia realsa, viaturas hirak ne’e, sira la determina no la define ninia presu estandarizasaun kada kareta, tanba haree mós tipu utilizasaun no mós presu orijinál ne’e rasik.

Maibé Dirijente ne’e esplika, viaturas sira-ne’ebé submete ona bá leilaun ne’e, maioria liu ona tinan utilizasaun liu tinan 6 bá leten, tanba tuir dekretu-lei n0.32/2011 no dekretu-lei n0.15/2012 define katak, bainhira liu ona tinan utilizasaun bá liu tinan 6 ou 150 kilomentrajen, submete ona bá leilaun.

Tanba ne’e, Januário da Gama fi’ar katak, liu husi leilaun ne’e, DJJPE sei bele hatama fali osan bá kofre estadu, hodi nune’e bele finansia fali programa no atividade iha tinan oin 2022.(ant)