Passaporte eletróniku (ePassport) 700 to’o Ona TL no Emite Ona ba Grupo Prioritario

Smnewstl.com – Governu konfirma katak, kaderneta pasaporte eletróniku (ePassport) hamutuk 700 mak to’o ona iha Timor-Leste no emite ona 174 ba pasiente sira ne’ebé presiza evakuasaun médika ba estranjeiru no sira ne’ebé akompaña, estudante, atleta no grupu prioritária sira seluk.

Nota infomativa husi governu justifika katak, prosesu akizasaun passaporte tama ona iha faze final no pakote ba kaderneta ne’ebé haruka mai Timor-Leste, mak unidade 73.840.

Prosesu ne’e akizisaun passaporte bazeia ba desizaun Konsellu Ministrus iha loron 27 fulan-setembru tinan 2023, kona-ba aprovasaun atu ajuste diretu ne’ebé urjente, fó kontinuidade ba prosesu aprovizionamentu atu adjudika akizisaun ba kaderneta Pasaporte Eletróniku.

Tuir exekutivu, emissaun passaporte rejista falla, tanba aumentu pedidu akizisaun passaporte, hafoin situasaun pandemika iha tinan 2022 no situasaun ne’e kontraria ho projesaun governu katak, impresaun anuál kaderneta ePassaport nian iha Timor-Leste maka unidade rihun 20.

Iha tinan 2022, inisia ona prosesu aprovizionamentu foun ida, ba akizisaun kaderneta ePassaport, maibe prosesu ne’e labele realiza tanba difikuldade prosesuál sira no situasaun hanesan akontese iha tinan 2023, ho planu akizisaun kaderneta passaporte 73.150, tanba kestaun prosesual, no ikus mai governu deside aselera ho desizaun husi Konsellu Ministru.

Entretantu, Iha tinan 2015 Ministériu Justisa selebra ona kontratu ida hodi fornese unidade kaderneta ePassaport hamutuk rihun 150, ne’ebé entrega ona husi tinan 2016 to’o 2019. (Smnews)