Pasarevista Deit Iha Komando Dili Nia Oin, Motorizada 20 ho Kareta 2 Konsege Tama ‘Gaiola’

Smnewestl.com (05-12-21) (Dili) — Polísia Nacional Timor Leste Unidade Tránzitu Munisípiu Dili kontinua halo pasarevista ba transpporte publiku no privado iha kapital nune’e evita asidente li-liu hasoru loron bo’ot natal no tinan foun ne’ebe hela deit ona loron. Iha pasarevista ne’e konsege motorizada 20 inklui kareta rua, tanba laiha dokumentu no mós xapa matríkula.

Komandante Polísia Tránzitu Munisípiu Dili, Inspetór Domingos Sarmento Gama hateten, kada tinan iha fulan Dezembru, sempre halo check point, nune’e bele eduka motorista sira-ne’ebé kondús kareta ho motor atu kompleta asesores transporte nian, inklui evita asidente.

“Tama ona bá loron boot natál no tinan foun ita halo pasarevista ga Check point para prevene asidente ou oinsá mak ita fó hanoin bá ita-nia komunidade sira, dokumentu laiha sira trata dokumentu, xapa matríkula laiha ita husu para sira trata ona, nune’e kontinua kumprimenta ba orden ba publiku,”dehan Inspetór Domingos Gama, iha Komandu Polísia Munisípiu Dili, segunda ne’e.

Durante pasarevista iha Komandu Dili nia oin, Polísia Tránzitu prende motorizada hamutuk 20, enkuantu kareta rua ne’e, ida laiha xapa matríkula kotuk oin, no ida seluk dokumentu la kompletu.

“Durante loron hira nia laran ita halo check point besik de’it Komandu tanba kondisaun transporte, entaun kondisaun transporte ne’e halo ita-nia pasarevista la bá dook, mais ita iha de’it iha Komandu Munisípiu Dili nia oin, maibé ita konsege prende motorizada 20 kareta 2,” dehan Gama.

Inspetór Domingos Gama afirma, Polísia Tránzitu la’ós halo pasarevista iha Komandu Dili de’it, maibé foku mós bá fatin seluk. Ikus-ikus ne’e, Polísia Tránzitu halo check point de’it iha Komandu Polísia Munisípiu Dili nia oin, tanba laiha transporte atu halo pasarevista iha fatin seluk.

“Bá fatin hotu iha Dili laran ne’e ita-nia fokus, ita tárjetu ne’e iha hotu par atu halo operasaun pasarevista, soke ita-nia kondisaun transporte nia halo ita la konsege la’o bá dook, ita atu la’o bá dook check point presiza transporte par bainhira ita prende evidénsia ruma ita tula ho kareta, bele lori mós ita-nia membru sira lori ekipamentu ne’ebé check point bá fatin ne’ebé ita hakarak check point,” afirma Gama.(ant)