Partisipa Seleberasaun Missaun Sentru Santa Bakhita Iha Ermera, Horta Enkoraza Srani Vasina

Smnewstl.com 08-02-2022 (Ermera) — Sarani husi parókia Letefoho Kapela Sagrada Coração de Jesus Eraulo selebra missa tinan 20 Missaun Sentru Santa Josefina Bakhita Eraulo bá dala 20, hodi hanoin hikas hahalok no lala’ok ne’ebé Santa Bakhita halo ona.

Iha omília Amu Selebran, Padre Juvito do Rego lori Sante Josefina Bakhita nia naran, agradese bá sarani tomak iha Eraulo, tanba bele hit aan hodi partisipa iha festa tinan 20 Santa Josefina Bakhita ninia hahalok no lala’ok tomak.

“Lori sentru Bakhita nian naran hakarak agradese bá ita-boot sira hotu ninia prezensa atu halo rame Eraulo iha selebrasaun tinan 20 Santa Josefina Bakhita ninia lala’ok, hahalok iha sentru oan ida-ne’e,” dehan Padre Juvito do Carmo, hafoin remata missa iha Kapela Sagrada Coração de Jesus Eraulo, suku Suku Eraulo Postu Letefoho Munisípiu Ermera, Tersa-ne’e.

Santa Josefina Bakhita mós atrai ema barak, no mós halo ona milagre barak, liu husi harii Missaun Sentru Santa Josefina Bakhita nian iha Eraulo. Tan ne’e, kada tinan sempre selebra festa Santa Josefina Bakhita nian.

“Ne’eduni imi keta baruk atu mai iha ne’e, feto metan oan ida-ne’e (Santa Josefina Bakhita) kbiit makas loos, halo milagre barak tiha ona, milagre sobre milgre, sentru ida-ne’e se ohin bele ejiste tanba feto metan ida-ne’e, nia mak hatene sira dalan, nia mak bá kore ema boot sira-nia fuan iha Austrália, Rotary Club, tanba Josefina Bakhita ninia hahalok,” subliña Amu Selebrante, Juvito do Rego.

Sorin seluk, Premiadu Nobel da Páz, José Ramos-Horta hateten, sente kontente simu konvite hodi partisipa iha missa selebrasaun Santa Josefina Bakhita nian bá dala 20.

“Ha’u simu konvite atu mai iha ne’e, ha’u buka ajenda par mai duni hanesan hatudu ha’u-nia haksolok, respeitu bá sira-ne’ebé servisu iha komunidade nia le’et ho esforsu hadi’a komunidade nia vida di’ak liu oituan, hatudu solidariedade umana, fraternidade umana, hatudu domin,” dehan Horta.

Eis PR ne’e mós enkoraja sarani Ermera tomak atu simu vasina kontra Covid-19, tanba númeru populasaun simu vasina sei menus.

Horta esplika, vaisna nu’udar medidas prevensaun bá variante foun Omicrom, tanba Líder Nasionál sira hanesan, Xanana Gusmão, inklui Amu Bispu rasik mós simu ona vasina bá dala tolu nian.

“Prevensaun ida vasina, ha’u halo dala tolu ona, Avo Nana halo dala tolu ona, Amu Bispu sira mós halo, Amu Papa mós halo, di’ak liu imi sarani tuir buat ne’ebé Amu Bispu sira halo, buat ne’ebé Amu Papa sira halo, la’ós tuir fali sira facebook dehan vasina la di’ak,” apela Horta.

Missa refere partisipa husi Eis PR no Premiadu Nobel da Páz, José Ramos-Horta, autoridade lokál, komandante PNTL Munisípiu Ermera no mós sarani sira husi. (Ant)