Partidu Polítiku 4 Husu PR Lú-Olo Kumpre K-RDTL Dekreta Kalendario Eleisaun, PR Bolu Atensaun ba Saude Publiku

Smnewstl.com 06-01-22 (Dili) — Prezidente Repúblika (PR), Francisco Guterres Lú olo, konvoka enkontru ho partidu polítiku 8 ne’ebé iha asentu Parlamentu Nasionál (PN) atu rona sira-nia hanoin tuir Konstituisaun Repúblika Demokrátika Timor-Leste (RDTL) artigu 86 alíena C molok dekreta data eleisaun prezidensiál.

Nune’e, partidu polítiku ne’ebé Xefe Estadu rona uluk mak hanesan, Partidu Demokrátiku (PD), Partidu Libertasaun Populár (PLP), Partidu Frente Mudansa no Partidu FRETILIN.

Iha enkontru ne’e, partidu polítiku 4 ne’e, husu PR Lú Olo, atu kumpre tuir de’it konstituisaun RDTL hodi dekreta kalendáriu bá eleisaun prezidensiál iha tinan 2022 ne’e.

Prezidente PD, Mariano Assanami Sabino hateten, PD iha responsabilidade atu instala prosesu demokrasia iha prosesu konstrusaun estadu, no valores demokrasia, maibé tenki kumpre nafatin konstituisaun RDTL.

“PD nu’udar Partidu Demokrátiku ne’ebé iha responsabilidade atu instala demokrasia bá ita-nia prosesu konstrusaun estadu, bá PD fó hanoin katak, ita presiza kumpre konstituisaun no mantein ho valores demokrasia, prátika ne’ebé ita tenki la’o tuir dalan demokrasia,” dehan Prezidente PD, Mariano Assanami Sabino, hafoin remata enkontru ho Xefe Estadu iha Palásiu Prezidensiál Aitarak-laran, Dili, kinta ne’e.

Líder jerasaun foun ne’e hatutan, ukun ne’e povu nian, tanba ne’e, ukun na’in sira tenki fó tempu bá povu atu bele partisipa iha festa demokrasia ne’e ho livre, maske iha hela situasaun pandemia Covid-19.

Sorin seluk, Reprezentante Partidu PLP, Francisco de Vasconselos informa, PLP fó hanoin bá Prezidente Repúblika, Francisco Guterres Lú-olo katak, tuir konstituisaun RDTL artigu 86 alíena C, prazu bá PR atu labele liu loron 60 atu dekreta data eleisaun nian.

“Opiniaun PLP nian katak, ita kumpre de’it mandatu konstitusionál, lei eleisaun prezidensiál ne’ebé guia ita katak, ita tenki hakruk tuir lei, labele liu loron 60, signfika ohin tenki prepara ona iha ne’e, semana mai Prezidente dekreta ona depende Prezidente dekreta data hira,” dehan Reprezentante PLP, Francisco Vasconselos.

Nia hatutan, PLP seidauk deside kandidatu ruma atu kompete iha eleisaun prezidensiál, tanba desizaun tomak tenki liu husi komferénsia nasionál partidu nian.

Nune’e mós, Prezidente Partidu Frente Mudansa Interinu, Egídio de Jesus ‘La Manas La Malirin’, kongratula Xefe Estadu, tanba halo tuir duni mandatu konstituisaun RDTL artigu 86 alíena C hodi bolu partidu polítiku sira molok fó data eleisaun nian.

“Sujere husi Partidu Frente Mudansa katak, iha meadus de Janeiru, na’i Prezidente ho nia kbiit prerogativu Prezidente nian, ami sujere meadus Janeiru ne’e bele dekreta ona lei fixa bá eleisaun prezidensiál,” dehan Egídio de Jesus.

Frente Mudansa mós fó rekomenda bá PR atu dekreta data bá realizasaun eleisaun, ou kampaña ka votasaun iha fulan Marsu, bainhira hakat bá segunda ronde sujere atu hala’o iha fulan Abríl.

“Iha artigu 7 hateten, poder iha povu nia liman ne’e, tenki liu husi direitu sufrájiu universál, vota direitu, livre, demokrátiku, sekretu no periódiku, tanba ne’e ita fó parabéns bá na’i Prezidente ne’ebé ohin bele rona ami, no ami-nia sujestaun mak ne’e,” sujere nia.

Parte seluk, Sekretaria Jerál Adjunta Partidu FRETILIN, Cipriana da Costa Perreira informa, objetivu husi sorumutu entre partidu FRETILIN ho Xefe Estadu ne’e, tanba PR presiza rona opiniaun partidu polítiku sira kona-ba realizasaun eleisaun prezidensiál iha fulan Marsu 2022.

“Husi partidu FRETILIN fó nia opiniaun balun, prinsipálmente opiniaun kona-ba durante realiza kampaña eleitorál, hanesan mós bá eleisaun prezidensiál saida mak ita presiza atu prevene liu-liu bá Covid-19 ne’e importante tanba, eleisaun ne’e sei mobiliza ema barak, eleitores barak,” dehan Cipriana Perreira.

Prezidente Repúblika, Francisco Guterres Lú-olo mós husu partidu polítiku sira, atu informa bá militantes sira, atu kuidadu aan nafatin husi pandemia Covid-19 durante prosesu kampaña no votasaun.

Eis Deputada primeira lejislatura ne’e reafirma, partidu FRETILIN seidauk deside ninia kandidatura bá eleisaun prezidensiál, tanba desizaun tomak liu husi komferénsia nasionál partidu nian.

Entretantu, tuir oráriu, Sesta-feira aban (07/01/22), Xefe Estadu sei hala’o fali enkontru ho partidu polítiku 4 seluk hanesan, CNRT, PUDD, KHUNTO no UDT.(ant)