Paixao-Taur Diskuti Rekrutamentu Konjunta ba Membru F-FDTL ho PNTL

Smnewstl.com 18-10-2021 (Dili) – Ministru Defeza (MD), Filomeno Paixão de Jesus halo audiénsia ho Primeiru-Ministru (PM), Taur Matan Ruak, hodi diskuti kona-ba planu atu halo rekrutamentu konjuntu bá membru foun FALINTIL Forsa Defeza Timor-Leste (F-FDTL) ho Polísia Nasionál Timor-Leste (PNTL) iha futuru.

Planu refere lao hela no husu orientasaun polítika husi Xefe Ezekutivu hodi bele implementa.

Ministru Defeza, Filomeno Paixão rekuinese, rekrutamentu ba membru F-FDTL ho PNTL maske la hamutuk 100%, maibé durante tempu balun membru husi instituisaun rua ne’e bele tuir formasaun akademia hamutuk hodi aprende kona-ba valor komún no valor relijiozu, hafoin fahe malu bá instituisaun ida-idak nian, atu nune’e sira bele respeita malu.

“Ita la dehan, rekrutamentu ida hamutuk 100%, mais durante tempu sira hamutuk par bele aprende. Por-ezemplu valores krensas prinsípius ne’ebé komún bá ita sira bele hamutuk durante fulan ida, rua, depois de ida-ne’e sira bele sai bá espesialidade. Ida-ne’e mak ohin ha’u husu orientasaun oituan husi Primeiru-Ministru,” dehan Ministru Defeza, Filomeno Paixão, hafoin remata enkontr ho Xefe Governu iha rezidénsia Farol, Dili. Segunda ne’e.

Governante ne’e justifika tan katak, rekrutamentu konjuntu ne’e mós atu bele halo membru husi instituisaun rua ne’e besik malu liután, no hafoin fahe malu iha iha krize 2006, iha ne’ebé rezultadu membru Polísia barak lakon vida.

“Durante ne’e imi hatene dehan, ita iha prosesu desde 2006 kazu mosu ne’e ita haree katak, entre forsas rua ne’e asveses iha kompetisaun fali, iha dezentendimentu, entaun ita buka hanusa par habadak distansia ne’e, porque halo sira moris durante tempu balun hamutuk par depois sira bele koñese malu. Iha ne’e mak ita hanoin kona-ba iha rekrutamentu konjuntu ne’e, mais la’ós hanesan ohin ha’u dehan, la’ós totál, mais durante tempu balun ne’ebé ita aprende disiplina komún konvein sira hamutuk,” afirma Paixão.

Maibé eis Vise Xefe Estadu Maiór Jenerál F-FDTL ne’e hatutan, planu refere sei iha hela faze preparasaun, tan ne’e, presiza simu orientasaun balun husi Xefe Governu, molok aprezenta bá iha reuniaun konsellu ministru iha fims fulan outubru tinan 2021 ne’e.

“Ami-nia dezeñu tinan oin, mais par ida-ne’e tenki rekrutamentu ne’e tenki akontese dala ida de’it, par depois sai husi ne’ebá mak ita fahe fali, (formasaun) hamutuk pelo menus iha disiplina ne’ebé kona-ba sira na’in-rua hanesan, ne’ebé sai bá espesialidade labele hamutuk ona,” esplika nia.

Entretantu, Ministériu Defeza, iha Orsamentu Jerál Estadu (OJE) tinan fiskál 2022 ne’e, prevé ona montante orsamentu hamutuk milliaun $ 1,2 hodi selu saláriu vensimentu bá rekrutamentu foun F-FDTL foun hamutuk 1,200. Iha ne’ebé mambru foun 600 iha ona faze treinamentu, enkuantu 600 seluk posibilidade sei akontese iha tinan 2023.

Tan ne’e, Ministru Filomeno Paixão, husu kandidatu sira-ne’ebé la pasa iha rekrutamentu liu bá, atu kuidadu sira-nia saúde, nune’e iha rekrutamentu tuir mai, sira bele tama de’it, tanba sira-nia naran apuradu tiha ona.(ant)