Smnewstl.com 07-02-2022 (Dili) — Segunda-feira ne’e maizumenus tuku 1 madrugada ema deskoñesidu asalta no sona mate joven ida ho naran kumpletu António de Jesus iha parte Aimutin Elemloi.
Alda Borger Soares kaben husi Matebian haktuir kronolojia katak, matebean António de Jesus hetan sona bainhira fila husi nia servisu fatin. Tuir Alda, matebean servisu ho sidadaun Indiano hanesan halo trambulan no fa’an iha Delta. Bainhira sai servisu iha tuku 1 madrugada fila bá uma mak hetan asalta to’o hakotu nia vida.
“Nia tama mai hakilar de’it, domin, Ena ema tá ha’u, mak ne’e de’it ona, ami sai mai hateke ba, nia tur los ho kondisaun oin kamutis no la ko’alia buat ida, to’o i’is kotu deit,” haktuir Alda Borges Soares, iha HNGV, Segunda-feira ne’e.
Alda Borges Soares hatutan, tuir nia hatrene, matebean nunka iha problema ho ema ruma inklui involve involve iha grupu arte marsiais .
“Nia atu hirus malu ho ema mós la’e, ódiu malu ema mós la’e, nia bá servisu sai mai mak ema asalta iha dalan, servisu fa’an trambulan iha jm 1 madrugada, nia problema laiha ida, sim nia sai jm 1 ho balun, nia la tama iha grupu (GAM) ida,” tenki nia.
Família matebian entrega ona bá parte saúde atu submete bá otopsia, nune’e bele hatene kauza husi António de Jesus nia mate.”Tenki halo otopsia tiha lai mak depois mak ita foin foti bá hakoi,” subliña nia.
Nia akresenta, sira evakua vítima bá Ospitál Naisonál Guidu Valadares (HNGV), maibé labele salva tanba hetan tá iha kabas parte karuk no sona tan iha kanotak iha parte karuk, nune’e rezulta ran sai maka’as no labele salva .
Entretantu, matebian António de Jesus mate ho tinan 25 husi Munisípiu Bobonaru postu Atabae, matebian mate husik hela fen kaben no oan mane ida ne’ebé sei ki’ik ho idade tinan 1 ho balun.
To’o oras ne’e, parte polisia seidauk identifika suspeitu no sei buka tuir liu husi CCTV iha area refere, tamba laiha sasin ruma.
Daduak ne’e mós, Polísia Nasionál Timor-Leste (PNTL), liu husi servisu informasaun sekreta kontinua buka tuir autór ne’ebé oho António de Jesus.
Ohin dadersan Segunda feira dia, 07/02/2022, mais ou menus tuku; 02:00 dadersan suspeitu oho iha area Aimutin besik salaun Esperanca nia sorin dalan tama ba iha Kampo Futebol Delta I. Ba informasaun ne’e rasik, parte PNTL sei aprezenta pozisaun.(ant)
Komentariu