Nino Pereira Diskuti Projeto Koperasaun ho Delegasaun Governador Instituto Rezilensia Indonésia

Smnewstl.com -Ministru Komérsiu no Indústria hala’o reuniaun kortezia ho delegasaun Indonesia ne’ebé lidera husi Governador Institutu Rezilénsia Nasionál Repúblika Indónezia (Lembaga Ketahanan Nasional Republik Indonesia – Lemhannas RI) Andi Widjajanto iha Gabinete MCI dader ne’e.

Iha sorumutu ne’e, Ministru Komérsiu no Indústria Filipus Nino Pereira aborda pontu situasaun ekonomia Timor-Leste nian no inklui polítika IX Governu Konstitusionál ba dezenvolvimentu ekonomia nasionál iha seitor komérsiu no indústria.

“Iha sorumutu ohin Ita koalia kona-ba zona industria, zona komérsiu livre, eksportasaun no importasaun, inklui tranzasaun ilegál iha fronteira entre nasaun rua.” Dehan Ministru iha komunikadu imprensa, ohin.

Asuntu ne’ebé konsidera pertinente mak zona komérsiu livre ne’ebé Timor-Leste no Indonesia diskute hela, no oinsá Timor-Leste bele aproveita merkadu indonésia hodi eskporta Timor-Leste nia produtu potensiál sira.

“Maibé Ita konsentra ba free trade area ne’ebé durante ne’e sai ona diskusaun entre Governu Timor-Leste no Governu Indonezia, no dezenvolvimentu ekonomia iha área fronteira. Ida-ne’e mak asuntu prinsipál ne’ebé sai diskusaun iha reuniaun ho delegasaun Indonezia nian ohin.” Kontinua Minstru.

Alein ne’e, diskute mós balansu komérsiu, tanba Timor-Leste atualmente depende maka’as ba produtu importadu. Maibé, Governu Timor-Leste halo hela esforsu oinsá bele halo balansu iha eksportasaun no importasaun.

“Indonezia iha esperiénsia barak kona-ba oinsá sira dudu sira-nia ekonomia liuhusi dezenvolvimentu empreza mikro no kiik sira. Ita opta polítika merkadu livre, ne’ebé ita hanoin kona-ba protesaun ita-nia merkadu, ida-ne’e importante hodi iha intervensaun seletiva, ne’ebé mak parte Ministériu Komérsiu no Indústria tenke haree hodi asigura ita-nia ekonomia rai laran.” Reforsa Ministru.

Iha parte seluk, Ministru mós koalia kona-ba dezenvolvimentu kooperativa, ne’ebé bele foti esperiénsia husi Provínsia NTT – Indonesia, hodi dudu kresimentu ekonomia povu nian iha Timor-Leste.

Governadór Andi Widjajanto fahe sira-nia esperiénsia kona-ba dezenvolvimentu ekonomia iha Indonezia, no preokupa ho tranzasaun ilegál ne’ebé akontese iha fronteira Timor-Leste no Indónezia. Tanba ne’e, sira preokupa oinsá dezenvolve ekonomia iha fronteira entre Timor-Leste no Indonezia. (Smnews)