MTK Sei Normaliza Aviaun Komersiál, Pasajeiru Tenki Hatudu Teste PCR Negativu

Smnewstl.com 24-11-2021 (Dili) – Ministru Prezidénsia Konsellu Ministru, Fidélis Magalhães hateten, tempu badak, Ministru Transporte Komunikasaun (MTK) sei hasai despaixu hodi reativa fali atividade voo komersiál.

Ministru Fidélis Magalhães hatutan, voo komersiál importante tebes, tanba tama ona iha eleisaun prezidensiál, tan ne’e sei iha observador internasionál sei mai inklui timoroan sira sei fila husi estranjeiru.

Maibé, antes atu mai Timor-Leste, presiza hatudu dokumentu komprovativu Covid-19 nian hanesan kartaun vasina no mós rezultadu teste PCR negativu.

“Rekizitu báziku sei iha, báziku no sentidu dehan, ema atu mai ne’e tenki hatudu komprovativu katak, nia vasina tiha ona, tenki hatudu teste PCR, maibé MTK sei normaliza fali aviaun komersiál sira. Aviaun komersiál importante tanba, ita tama eleisaun prezidensiál ona, observador barak mós sei bá mai, Timoroan sira iha rai li’ur mós barak atu mai,” dehan Ministru Fidélis iha Palásiu Governu, Dili, kuarta ne’e.

Nia esplika, reativa voo komersiál ne’e, la presiza hetan deliberasaun husi konsellu ministru, maibé, presiza de’it despaixu husi MTK, nune’e Autoridade Navegasaun Aeroportu Timor-Leste (ANATL) bele ezekuta, tanba ne’e kompeténsia MTK nian.

“MTK iha tempu badak nia laran sei normaliza hikas fila-fali ligasaun aviaun komersiál, konsellu ministru la bandu aviaun atu bele tama ga la tama, tanba ne’e kompeténsia MTK ho Aviasaun Sivíl nian. Buat ne’ebé uluk konsellu ministru impoin ne’e, la dehan aviaun labele tama, konsellu ministru altura ne’ebá dehan, ema bainhira atu mai tenki hetan autorizasaun antes,” tenik nia.

Tan ne’e, Fidélis Magalhães subliña, agora kabe bá kompeténsia ajénsia aviaun sira, tanba kuandu normaliza ona, tenki aumenta nia frekuénsia voo komersiál, kuandu sira sente ne’e nu’udar oportunidade negósiu bá sira-nia investimentu.(ant)