MS Seidauk Iha Planu Fo Vasina Datoluk Bá Komunidade, Membro Governo Simu Dadauk Ona

Smnewstl.com 05-01-2022 (Dili) – Ministériu Saúde (MS), seidauk iha planu atu fó vasina ka Booster Pfizer datoluk bá sidadaun sira.

Ministra Saúde, Odete Maria Freitas Belo hateten, vasina booster pfizer ne’e, sei fó prioridade liu bá pessoál liña frente hanesan, profisionál saúde, Polísia, F-FDTL no mós entidade ne’ebé hala’o servisu iha pontu entrada sira inklui membro governo ne’ebe konsidera sai alvu mos.

“La’e. Ami iha 100.000 dozes ne’ebé mak disponível hela, entaun ita haree uluk bá iha enfermeiru sira, tamba bainhira iha kazu, ita koloka sira para atu bele atende, ita fó uluk bá sira, depois ami mós haree pessoál sira-ne’ebé servisu iha alfándega, Portu, aeroportu, fronteira,” informa Ministra Saúde, Odete Belo, iha Palásiu Governu, Kuarta-feira ohin.

Nia hatutan, membru governu mós sai alvu bá vasina datoluk ne’e, nune’e bele sai ezemplu bá sidadaun sira atu bele nafatin tuir.

“Hanesan membru governu ita hakarak nafatin atu hatudu dehan, vasina terseira doze ka booster ne’e, la’ós atu fó de’it bá komunidade, maibé governu sai hanesan ezemplu ida hola parte ida terseira doze nian,” tenki nia.

Provizoriamente Ministériu Saúde, iha vasina Pfizer dozes 5000 de’it, tan ne’e, sei identifika pessoál ne’ebé sai prioridade atu bele bele simu booster pfizer ne’e.

Entretantu, governu hahú lansa ona vasina booster pfizer bá datoluk iha loron 3 fulan Janeiru 2022 ne’e, bá pessoál liña frente sira.(ant)