Movimentu 4 Konsidera Deklarasaun Alkatiri La Edukativu, PR Foun Mak Bele Konvoka Diálogu

Smnewstl.com 03-02-2022 (Dili) — Movimentu 4 hanesan ACBN,CRN 1, MAPK no MNJP konsidera, deklarasaun Sekretáriu Jerál Partidu FRETILIN, Marí Alkatiri ne’ebé dehan, sei konvoka diálogu ho líder nasionál husi 1974 no 1975 ne’e la edukativu no la kontribui bá klima entendimentu.

Porta Voz movimentu 4, Sancho Goncalves afirma, Prezidente Repúblika (PR) foun ne’ebé sei eleitu liu husi eleisaun prezidensiál mak bele konvoka diálogu entre líder nasionál sira nune’e bele iha entendimentu.

“ACBN, CRN 1, MAPK no MNJP hakarak mos hatan bá Dr Mari Alkatiri nian deklarasaun kona-ba apelu bá diálogu líderes hotu 1974/75 nian. Deklarasaun ne’e la eduka no la mós kontribui ba klima entendimentu, tamba hato’o iha momentu ne’ebé atu hatudu tan ba povo lia bosok katak, nia maka úniku líder ne’ebé advoga diálogu,” dehan Sancho Gonçalves, liu husi komferénsia imprensa iha Sede PST Balide, Dili, Kinta-feira ne’e.

Ba ACBN, CRN 1, MAPK no MNJP hakarak afirma katak, diálogu mak uniku dalan ba rezolusaun divergensia, maibé tama ona iha prosesu kampaña eleisaun prezidensiál nune’e diak liu bá de’it eleisaun no intrega inisiativa ne’e ba prezidente foun maka bele halo, la’ós sira jerasaun 74/75 de’it,” deklara Porta-voz ne’e.

Entretantu, antes ne’e, Sekretáriu Jerál Partidu FRETILIN, Marí Alkatiri hafoin fila husi Portugal deklara katak, sei konvoka diálogu ho líder nasionál sira, atu kontribui bá solusiona situasuan polítika iha rai laran. (ant)