MNEC Orienta Embaixada Urjentemente Buka Solusaun ba Konflitu Entre Jovens Iha Fatima, Portugal

Smnewstl.com – Ministru Negósiu Estranjeiru no Kooperasaun (MNEK), Bendito dos Santos Freitas, orienta ona Embaixada Timor-Leste iha Portugál atu urjentemente buka mekanizmu hodi fó solusaun bá konfrontu entre joven sira iha Portugal.

Pozisaun Ministru Negósius Estranjeirus no Kooperasaun, Bendito dos Santos Freitas ne’e, hodi hatán bá preukupasaun ne’ebé deputadu Parlamentu Nasionál no públiku Timor sira-nian, kona-ba konfrontu entre joven Timoroan sira iha Fátima Portugál, ne’ebé akontese iha madrugada loron 02 fulan Juñu ne’e.

“Preukupasaun ne’ebé Membru Parlamentár sira foti kona-ba akontesimentu konfrontu trájiku entre Timoroan sira iha Portugal, MNEK halo ona chamada para halo kordenasaun urjente ho Embaixadora Timor nian iha Lisboa, atu bele haree situasaun ida-ne’e. Prosesu la’o hela, ita nia Embaixada ho Polísia Judisiáriu Portugeza servisu hamutuk hodi buka solusaun ba problema refere, no mós aproximasaun ho madre sira Leiria Fátima, Embaixadora sira haree hela urjentemente problema ida ne’e no sei utiliza kanál sira hotu atu bele rezolve lalais.  Mekanizmu ida mak sei konvoka reuniaun para bele husu rekonsiliasaun ka perdaun entre membru sira,” hatete Ministru Bendito.

Oras ne’e dadauk, Embaixada Timor-Leste nian iha Lisboa Portugál hamutuk ho Polísia Judisiária no mós Madre sira iha Leiria Fátima, buka hela solusaun bá problema refere, nune’e bele halo rekonsiliasaun entre joven grupu sira.

Governu mós sei bolu ajénsia sira-ne’ebé mak fasilita joven sira bá Portugál ne’e, atu iha responsabilidade ba sira, nune’e antes haruka ba, tenki sira kumpre ba lei no regulamentu husi nasaun ne’e nian.

“Maibé prosesu ne’e tenki iha mós espetativas katak, Governu tenki foti mós solusaun bá ajénsia sira-ne’ebé haruka Timoroan sira bá, sira mós tenki iha responsabilidade moral atu tetu ema sira-ne’e antes bá servisu, sira-nia komprimentu bá lei no regulamentu ne’ebé atu simu Timoroan sira-ne’e, ita atu hatudu nafatin dignidade, prinsípius no valores direitus umanus no liberdade,” hatene Governante ne’e.

Konfrontu diskonfia involve husi Membru Grupu Arte Marsiais 22 (PSHT) ho Arte Ritual 77, hodi rezulta joven mane ida naran Domingos do Rego, moris iha loron 1 fulan Dezembru tinan 1998, husi Tula Takeu, Munisípiu Aileu sofre kanek ho nain 5 seluk no dadauk ne’e halo hela tratamentu saúde iha ospital Leiria.

Polísia Judisiáriu Portugueza mós dadauk ne’e, investiga hela joven husi grupu rua ne’e, tanba to’o oras ne’e, seidauk identifika joven ne’ebé mate no na’in lima seluk kanek ne’e pertense ba grupu ida-ne’ebé.(*/Smnews)