MJM Deklara Apoiu Espoza PM Taur Kandidata Aan Bá PR

Smnewstl.com (Dili) — Movimentu Juventude Milleniál (MJM) deklara, fó apoiu tomak bá espoza Primeiru-Ministru (PM), Isabel da Costa Ferreira atu kandidata aan independente bá Prezidente Repúblika (PR) periódu tinan 2022 to’o 2021.

Porta-voz MJM, Aniceto Alberto Carlos hateten, rajaun sira hakarak kandidata eis Primeira Dama, Isabel Ferreira bá PR, tanba Isabel Ferreira hanesan ema ativista ida-ne’ebé sempre luta bá kestaun direitus umanus iha Timor-Leste.

“Ami MJM hakarak husu doutora Isabel da Costa Ferreira atu kandidata independente bá Prezidente Repúblika, iha biban ne’e ami mós afirma ho prontidaun hodi manifesta ami-nia apoiu inkondisionálmente bá kandidatura Doutora Isabel da Costa Ferreira bá iha eleisaun Prezidente Repúblika bá periódu 2022-2027,” dehan Porta-voz MJM, Aniceto Alberto Carlos, iha komferénsia imprensa sábdu (21/08/21) iha Bemfica, Dili.

Porta-voz afirma, Timor-Leste oras ne’e dadauk nakonu ho kultura vingativa no konsiente katak, polítikamente falladu, tanba ne’e hamosu problema oi-oin iha setór sosial.

Ho rajaun hira ne’e mak, MJM hakarak kandidata espoza Primeiru-Ministru, Taur Matan Ruak bá eleisaun prezidensiál, tanba Isabel Ferreira hanesan feto ida-ne’ebé bele asegura unidade nasionál no mós bele sai guardiaun bá konstituisaun RDTL.

“Ami hanoin pertinente tebes atu istória Timor-Leste nian, liu-liu iha momentu krusiál hanesan ne’e, atu sai PR bá RDTL tenki feto ho jéneru, feto ne’ebé iha abilidade, kompeténsia, integridade no koñesimentu,” tenik nia.

Nune’e, MJM hakarak la’o hamutuk ho Isabel da Costa Ferreira, tanba nia hanesan líder joven ida, no bele hahú atu loke odamatan mai ami juventude sira hodi luta bá mudansa.

Maski nune’e nia hatutan, atu luta bá mudansa, joven sira presiza sakrifika aan, korajen no didikasaun no voluntarízm, biar la’ós fásil, nune’e mós la’ós impossível atu mudansa ne’e bele akontese.

MJM mós konfirma ona ho espoza Xefe Governu, Isabel da Costa Ferreira, atu kandidata aan bá Prezidente Repúblika iha eleisaun prezidensiál tinan 2022.(ant)