MJ Cárceres Propoin Adisionál Rihun $200 Dezenha Prizaun Weberek

Smnewstl.com 20-09-2021 (Dili) – Ministru Justisa, Manuel Cárceres afirma, sei husu tan osan adisionál rihun $ 200 iha fundus infraestrutura liu husi Komisaun Revizaun Orsamentu Polítika (KROP) Orsamentu Jerál Estadu (OJE) 2022, nune’e hahú dezeñu prizaun iha Weberek.

“Ohin mós ha’u informa bá señór Primeiru-Ministru atu husu tan orsamentu adisionál bá iha fundus infraestrutura iha KROP ne’e mais ou menus $ 200 mill hanesan ne’e par atu tinan oin ita halo dezeñu ona prizaun Weberek nian,” dehan Ministru Justisa, Manuel Cárceres, hafoin remata sorumutu ho PM Taur iha Palásiu Governu.

Governante ne’e dehan, tetu fiskál OJE 2022 ne’ebé Ministériu Finansas atribui bá ministériu justisa hamutuk milliaun $ 12, tanba ne’e la sufisiente atu prepara bá dezeñu prizaun Weberek munisípiu Manufahi nian.

“Ne’ebé lahatene aban lokraik mak konsellu ministru atu aprova orsamentu ne’e, ha’u mós seidauk haree tetu finál ministériu justisa nian. Aban mak ita hatene orsamentu tetu finál ministériu justisa nian ne’e hira, agora dadauk tetu fiskál sira fó ne’e besik $ 12 milloens, mais como sente la to’o ha’u husu tan oituan, depois aban mak ita haree tok,” afirma Cárceres.

Manuel Cárceres subliña, bainhira sidadaun sira la viola ona lei maka governu mós sei taka ona prizaun iha Timor-Leste.

Tanba tuir nia, bainhira sidadaun sira kontinua viola lei iha Timor-Leste, maka ezekutivu mós nafatin prepara prizaun.

Alem de ne’e nia informa, guarda prizionál ho dadur sira-ne’ebé antes ne’e infetadu bá Covid-19, agora sira rekoperadu hotu ona.(ant)