Misa ba Perfurasaun Mina Hahu Ona, Populasaun Suai Agradese Xanana

Smnewstl.com 27-10-2021 (Covalima) –Dader ne’e iha Igreza Ave Maria Suai realiza ona misa ba lansamentu perfurasaun Mina husi Kompanha Timor Resource, ne’ebe tuir orario sei halao iha oras balun nia laran tan.

Misa ne’ebe prezide husi Amo Parco Sebastião Eugenio da Cruz Correia ne’e partisipa kedas husi Primeiro Ministro, Taur Matan Ruak ho komitiva. rasik partisipa mos Primeiro

Iha momentu importante ne’e, srani ne’ebe marka prezensa hato’o agradesimentu ba Kay Rala Xanana Gusmao tamba konsiderado ho nia politika maka ohin loron lori povu Suai ba asesu naroman inklui estrada sira.

“Hanesan Suai oan hakarak agradese tebes ba Maum Boot Kay Rala Xanana Gusmao tamba iha prosesu ne’e nia laran ami akompanha maka’as aman ne’e nia partisipasaun,”tenik komunidade Veronica Alves.

Nia hatutan, durante ne’e rona dehan Timor riku mina nune’e halo Kay Rala Xanana Gusmao tur la hakmatek hodi kontinua luta maske idade avansada ona no ikus mai hafoin manan tia soberania tasi, ohin marka istoria foun ba perfurasaun ne’e.

Hanesan foinsae, Joao Moniz husu ba populasaun sira hotu liliu Suai oan atu hamutuk konsentra hanoin ida deit tau ba kotuk divergensia prepara a’an simu dezenvolvimentu ne’ebe atu mai.

“Ita Suai oan tenki orgulho, buat sira ne’e hotu mai la ses mos husi politika liliu Maun Bo’ot Kay Rala Xanana Gusmao nian. Ita koalia Xanana, tamba ho nia obra maka ita bele sente dadauk ona maske seidauk masimu, maibe ita tenki agradese.

Ita mos tenki agradese ba mos ba Primeiro Ministro, Taur Matan Ruak, Jose Ramos Horta, Marí Alkatiri, Lere Anan Timor no fundador sira seluk, tamba lori sira maka ohin loron ita bele goja,”tenik nia.

Remata misa, Xefe Governu ho komitiva sei desloka kedas ba fatin perfurasaun mina matan rua iha Feto Kmaus, Aldeia Tabako Klot, Suco Debus Suai Vila no ida seluk iha aldeia Sanfuk Suku Kamanasa hodi halo lansamentu.(ant)