Smnewstl.com 21-10-2021 (Dili) – Xefe Delegasaun atuál Ministru Koordenadór Assuntus Ekonómikus (MKAE), Joaquim Amaral defende katak, biti la’ós atu uza b’a tur no toba de’it, maibé bele uza bá dansa no sama háre tuir tradisaun no kultura Timor-Leste nian maske hetan reasaun maka’as iha publiku li-liu media social, ne’ebe sai viral los.
Xefe Delegasaun ne’e esplika, biti ne’ebé grupu dansa kulturál sira uza bá dansa iha Expo Dubai ne’e hanesan instrumentu materiál ida ne’ebé Timor rasik mak prodús, no mós Timoroan sira rasik mak uza hodi halo aprezentasaun liu husi dansa kulturál iha Expo Dubai.
“Biti ne’e instrumentu ida nia material ne’e halo iha Timor, skill Timoroan sira mak halo, nia utilizasaun ne’e mós la’ós hodi toba de’it, hodi han, hodi sama háre hodi halo buat hotu, ne’ebé hanoin katak, Timoroan hotu-hotu hanoin katak, biti hodi toba de’it hanoin nia foin mai Timor karaik,” dehan Ministru Joaquim Amaral, iha aeroportu Nicolau Lobato, ne’e ne’e, hafoin fila husi Expo Dubai 2020 durante semana.
Executivo ne’e hatutan, grupu artista sira ne’ebé uza biti ne’e, komisaun organizadora halo selesaun bazeia bá zona turístiku tolu husi kompostu husi zona leste, sentrál no oeste ne’ebé potensiál bá sentru turístiku iha Timor-Leste.
“Ha’u hanoin biti ne’e Timor laran hotu iha, selesaun bá sira bá dansa ne’e bazeia bá rejiaun sira-ne’ebé iha potensiál sentru turístiku, Timor-Leste fahe bá rejiaun turístiku tolu, leste, sentrál ho oeste no sira reprezenta zona tolu ne’e, biti enjerál, miabé, artista sira reprezenta zona tolu ne’e,” tenik nia.
Maske hetan kritika maka’as, maibe Xefe Delegasaun ne’e nafatin apresia grupu dansa kultural husi zona turístika tolu ne’e, tanba ho kreatividade ne’ebé iha, konsege hatudu ona iha Expo Dubai.
“Saida mak sira halo ita apresia ho esforsu ho kreatividade ne’ebé iha ita louva ho esforsu ne’ebé sei iha ho limitasoens tempu ne’ebé badak, tanba restrisaun Covid-19 ita labele mobiliza rekursu ne’ebé boot liu ida-ne’e, maibé sira konsege uza optimaliza rekursu ne’ebé iha hodi hala’o aprezentasaun hodi reprezenta Timor-Leste,” tenik nia.
Nia relata tan katak, sei iha eventu barak, tan ne’e fi’ar katak, grupu sira seluk ne’ebé la konsege bá, bele halo preparasaun di’ak liután, nune’e bele selesionadu atu bele hatudu dansa di’ak liután iha futuru, tanba Expozisaun Dubai 2020 ne’e sei remata iha loron 30 fulan Marsu tinan 2022.(ant)
Komentariu